ലണ്ടന്‍: ഇംഗ്ലീഷ് പ്രീമിയര്‍ ലീഗിലെ മൂന്നാം സ്ഥാനക്കാരായ ലെസ്റ്റര്‍സിറ്റിക്കെതിരെ നേടിയ ജയം എവര്‍ട്ടണിന് യൂറോപ്പാ ലീഗില്‍ കളിക്കാനുള്ള സാധ്യത കൂട്ടി. ഇന്നലെ 2-1നാണ് എവര്‍ട്ടണ്‍ ലെസ്റ്ററിനെ അപ്രതീക്ഷിതമായി തകര്‍ത്തത്. ലീഗില്‍ 11-ാം സ്ഥാനത്തുമാത്രമുള്ള എവര്‍ട്ടണിന് ജയം അത്രയേറെ നിര്‍ണ്ണായകമാണ്.
ആദ്യപകുതിയുടെ തുടക്കത്തില്‍ തന്നെ ലെസ്റ്ററിന്റെ വല രണ്ടു തവണ കുലുക്കിയാണ് എവര്‍ട്ടണ്‍ കരുത്തറിയിച്ചത്. 10-ാം മിനിറ്റില്‍ റിച്ചാര്‍ലിസണും 16-ാം മിനിറ്റില്‍ പെനാല്‍റ്റി മുതലാക്കി സിഗുര്‍സണുമാണ് ഗോളുകള്‍ നേടിയത്. കളിയുടെ രണ്ടാം പകുതിയില്‍ ലെസ്റ്റര്‍ കിണഞ്ഞുപരിശ്രമിച്ചെങ്കിലും ഒരു ഗോള്‍ മാത്രമാണ് തിരിച്ചടിക്കാനായത്. ഇഹിയാനാ ച്ചോവാണ് 51-ാം മിനിറ്റില്‍ ലെസ്റ്റിന്റെ ഏക ഗോളിന് അവകാശി.
കൊറോണക്കാലത്ത് കളി പുനരാരംഭിച്ച ശേഷം ആദ്യമായാണ് ലെസ്റ്റര്‍ തോല്‍ക്കുന്നത്. എവര്‍ട്ടണിനെ സംബന്ധിച്ച് ഇനി ഒരു ജയം നേടിയാല്‍ കാത്തിരിക്കുന്നത് ലീഗിലെ 8-ാം നമ്പര്‍സ്ഥാനമാണ്. നിലവില്‍ ടോട്ടനമാണ് 45 പോയിന്റുകളുമായി നിലയുറപ്പിച്ചിരിക്കുന്നത്. ജയം 3 പോയിന്റു നല്‍കുന്നതോടെ എവര്‍ട്ടണിന് നിലവിലെ 44 പോയിന്റ് 47 ആക്കി മുന്നേറാം. ആദ്യ 8 സ്ഥാനക്കാര്‍ക്ക് യൂറോപ്പാ ലീഗ് കളിക്കാന്‍ അവസരം ലഭിക്കും എന്നതാണ് എവര്‍ട്ടണ്‍ സ്വപ്‌നം കാണുന്നത്.
