ലോകത്തിന്റെ വളര്ച്ച വളരെ വേഗത്തിലാണ് ഓരോ ദിവസവും തുടങ്ങുന്നത് പുതിയ രീതികള് പരിചയപ്പെടുത്തി കൊണ്ടാണ്. എന്നാല് അവ എത്രത്തോളം പ്രാവര്ത്തികമാണ് എന്നു കൂടി ശ്രദ്ധിക്കേണ്ടതുണ്ട്. വേനലവധിക്കാലം കാത്തിരുന്ന കുട്ടികള്ക്ക് ഈ വര്ഷം ലഭിച്ചത് അഞ്ച് മാസത്തോളം നീണ്ടുനിന്ന അവധിക്കാലമാണ്. വീട്ടിനുള്ളില് മാത്രം ഒതുങ്ങിപ്പോയ ദിവസങ്ങള്. രണ്ടുമാസം കിട്ടുന്ന വേനലവധിക്ക് അച്ഛനമ്മമാരോടൊപ്പം വിവിധ സ്ഥലങ്ങളില് പോകാനും അതു കഴിഞ്ഞ് ജൂണ് മാസത്തില് സ്കൂള് തുറക്കുമ്പോള് കൂട്ടുകാരെ കാണാനായി ആവേശത്തോടെ സ്കൂളിലെത്താനും ഇത്തവണ അവര്ക്ക് സാധിച്ചിട്ടില്ല. അതിനെല്ലാം വില്ലനായത് കൊറോണയെന്ന് പ്രത്യേകം പറയേണ്ടതില്ല. ആദ്യമായി സ്കൂളിലെത്താന് കൊതിച്ച കുരുന്നുകളുടെ പ്രതീക്ഷകള്ക്ക് വിപരീതമായിട്ടാണ് 2020 എന്ന വര്ഷം കടന്നുവന്നത്.
കൊറോണ എന്ന മഹാമാരിയുടെ പിടിയിലാണ് നമ്മുടെ രാജ്യം. രോഗം പടരാതിരിക്കാനായി സ്കൂളുകള് അടക്കേണ്ടി വന്നു. എന്നാല് ജൂണ് ഒന്നിനു തന്നെ ഓണ്ലൈന് വഴി ക്ലാസുകള് ആരംഭിച്ചു. ഇത് എല്ലാവര്ക്കും ലഭിക്കുന്നുണ്ടോ എന്ന ഒരു ചോദ്യം ഇപ്പോഴും ബാക്കിയാണ്. ഓണ്ലൈന് വിദ്യാഭ്യാസത്തിലൂടെ കുട്ടികളുടെ ഭാവി എന്താകുമെന്ന് ചിന്തിക്കേണ്ടിയിരിക്കുന്നു. സര്ക്കാര് സ്കൂളുകള് എല്ലാം തന്നെ മികവുറ്റതാക്കിയെന്ന് പറയുമ്പോഴും പൊട്ടിയെ ബെഞ്ചും തകര്ന്ന മതില്ക്കെട്ടുകളും പല സ്കൂളുകളില് ഇന്നും ബാക്കിയാണ്. ഇതിനിടയില് ഈ ഓണ്ലൈന് പഠനം 100% വിജയമാകുമോ? എല്ലാ കുട്ടികള്ക്കും ടിവി, ലാപ്ടോപ്, മൊബൈല് എന്നീ സൗകര്യങ്ങള് ഉറപ്പുവരുത്താനാകുമോ? അവ എത്തിച്ചു കൊടുക്കാന് ശ്രമം നടക്കുന്നുണ്ടെങ്കിലും അത് പൂര്ണമായി വിജയിക്കുന്നുണ്ടോ? എന്നീ ചോദ്യങ്ങള്ക്ക് വ്യക്തമായൊരു ഉത്തരം ഉറപ്പുവരുത്തേണ്ടതാണ്.
ഈ അധ്യയന വര്ഷം നഷ്ടപ്പെടാതിരിക്കാനാണ് ഇത്തരമൊരു തീരുമാനമെടുത്തതെങ്കിലും കുട്ടികളുടെ ഭാവിയുടെ കാര്യത്തില് ആശങ്ക ഒഴിഞ്ഞിട്ടില്ല. ഓണ്ലൈന് വഴി ക്ലാസുകള് ലഭ്യമാണെങ്കില് കൂടി ചെറിയ ക്ലാസിലെ കുട്ടികളുടെ കാര്യം ബുദ്ധിമുട്ടിലാണ്. അടുത്തു നിന്ന് കാര്യങ്ങള് പറഞ്ഞു കൊടുക്കാന് ഒരാള് അവര്ക്ക് അത്യാവശ്യമാണ്, പ്രത്യേകിച്ചും അച്ഛനും അമ്മയും ജോലിക്ക് പോകുന്ന കുട്ടികളുടെ കാര്യം കഷ്ടമാണെന്നുതന്നെ പറയാം. അവരുടെ പഠന സമയത്ത് രക്ഷിതാക്കള് അടുത്തു വേണമെന്നില്ല. കൂടാതെ മഴക്കാലമാണ് കറന്റ് കട്ട്, കേബിള് സിഗ്നല് നഷ്ടപ്പെടുക എന്നിങ്ങനെയുളള പലവിധ പ്രശ്നങ്ങളും മുന്കൂട്ടി കാണേണ്ടതുണ്ട്. എല്ലാ ന്യൂനതകളും ഒരുപോലെ പരിഹരിക്കാന് കഴിയില്ലെങ്കിലും എല്ലാ കുട്ടികള്ക്കും ഒരുപോലെ ക്ലാസ് ലഭിക്കാന് ശ്രദ്ധിക്കേണ്ടത് അത്യാവശ്യമാണ്. അല്ലാത്തപക്ഷം കുട്ടികളുടെ ഭാവിയെ തന്നെ ഇത് ബാധിക്കും.
കൂടാതെ അവരുടെ മാനസികാവസ്ഥയെയും അത് ബാധിക്കുമെന്നതില് സംശയമില്ല.
ഓണ്ലൈന് ക്ലാസിന്റെ ആരംഭത്തില് തന്നെ വിദ്യാര്ഥിയുടെ ആത്മഹത്യക്ക് നാം സാക്ഷിയായതാണ്. ഒരു പദ്ധതി നടപ്പിലാക്കുമ്പോള് അതിന്റെ ന്യൂനതകള് പരിഹരിക്കേണ്ടത് അത്യാവശ്യമാണ് നമ്മുടെ വിദ്യാഭ്യാസ രീതി ആരംഭിക്കുന്നത് ഗുരുകുല സമ്പ്രദായത്തില് നിന്നാണ്. അവിടെ നിന്നും തുടങ്ങി ഇന്ന് ഓണ്ലൈന് പഠനം വരെ എത്തിയിരിക്കുന്നു. എല്ലാവര്ക്കും ഒരുപോലെ ലഭ്യമാകുന്നു എങ്കില് ഈ പഠനം നമ്മുടെ വളര്ച്ചക്ക് ഒരു മുതല് കൂട്ടാണ്. അല്ലെങ്കില് കുട്ടികളുടെ ഭാവിക്കുതന്നെ ഇത് ഭീഷണിയാകും എന്ന കാര്യത്തില് സംശയമില്ല.
Comments