ന്യൂഡല്ഹി: അതിര്ത്തിയില് ചൈന പ്രകോപനം തുടരുന്നതിനിടെ പ്രതിരോധ മേഖലയുടെ കരുത്ത് വര്ധിപ്പിക്കാനൊരുങ്ങി കേന്ദ്രസര്ക്കാര്. ഇതിന്റെ ഭാഗമായി റഷ്യയില് നിന്നും 33 യുദ്ധവിമാനങ്ങള് വാങ്ങാനുള്ള പ്രൊപ്പോസലിന് ഡിഫന്സ് അക്വിസിഷന് കൗണ്സില് അംഗീകാരം നല്കി.
നിലവിലുള്ള 59 മിഗ് 29 യുദ്ധവിമാനങ്ങള് നവീകരിക്കുന്നതിനൊപ്പം 21 മിഗ് 29 വിമാനങ്ങളും 12 സുഖോയ്-30 എംകെഐ യുദ്ധവിമാനങ്ങളും വാങ്ങാനാണ് അനുമതി നല്കിയിരിക്കുന്നത്. നവീകരിച്ച മിഗ് 29 വിമാനങ്ങള്ക്കും പുതുതായി വാങ്ങുന്നവയ്ക്കും കൂടി 7,418 കോടി രൂപയാണ് ചെലവ് പ്രതീക്ഷിക്കുന്നത്. സുഖോയ്-30 വിമാനങ്ങള്ക്ക് 10,730 കോടി രൂപ ചെലവ് വരും. ആയുധങ്ങള് വാങ്ങാനായി ഏകദേശം 38,900 കോടി രൂപയാണ് കേന്ദ്രസര്ക്കാര് നീക്കിവെച്ചിരിക്കുന്നത്.
രാജ്യാതിര്ത്തികള് സംരക്ഷിക്കുന്നതിനായി സായുധ സേനയെ കൂടുതല് കരുത്തുറ്റതാക്കേണ്ടതുണ്ട്. പ്രധാനമന്ത്രിയുടെ ആത്മനിര്ഭര് ഭാരത് എന്ന ആശയത്തിനും ഇത് ഊര്ജ്ജം പകരും. കേന്ദ്രപ്രതിരോധമന്ത്രി രാജ്നാഥ് സിംഗിന്റെ അദ്ധ്യക്ഷതയില് ചേര്ന്ന യോഗത്തിലാണ് റഷ്യയില് നിന്നും ആയുധം വാങ്ങാനുള്ള പദ്ധതിക്ക് അനുമതി നല്കിയത്.