ന്യൂഡല്ഹി: രാജ്യാതിര്ത്തികളില് ചൈന പ്രകോപനം സൃഷ്ടിക്കുന്ന സാഹചര്യത്തില് ഇന്ത്യന് മഹാസമുദ്രത്തില് നിരീക്ഷണം ശക്തമാക്കി നാവികസേന. കരസേനയും വ്യോമസേനയും ലഡാക്ക് ഉള്പ്പെടെയുള്ള മേഖലകളില് നിരീക്ഷണം ശക്തമാക്കിയതിനു പിന്നാലെയാണ് ഇന്ത്യന് മഹാസമുദ്രത്തിലെ നാവികസേനയുടെ നടപടി.
ഇന്ത്യന് മഹാസമുദ്രത്തില് ഇന്ത്യ വളരെ ശക്തമായ നിരീക്ഷണമാണ് നേരത്തെയും നടത്തിയിരുന്നത്. ജലമാര്ഗം ചൈനക്ക് ഇന്ത്യന് മഹാസമുദ്രത്തില് പ്രവേശിക്കാന് യാതൊരു പഴുതും നല്കാതെയുള്ള നിരീക്ഷണമാണ് നിലവില് ശക്തമായി തുടരുന്നത്. ഇന്ത്യന് മഹാസമുദ്രത്തിലുള്ള നിരീക്ഷണം ശക്തിപ്പെടുത്തുന്നതിന്റെ ഭാഗമായി 2015ല് ഇന്ത്യ പ്രത്യേക പദ്ധതി തയ്യാറാക്കിയിരുന്നു. ‘സാഗര്’ (സെക്യൂരിറ്റി ആന്ഡ് ഗ്രോത് ഓഫ് ഓള് റീജിയന്) എന്ന പദ്ധതിക്കാണ് ഇന്ത്യ അന്ന് രൂപം നല്കിയത്.
ഗാല്വനിലേതിനു സമാനമായി സമുദ്രത്തില് ചൈന സാഹസത്തിനു മുതിര്ന്നാല് നേരിടാന് നാവികസേനയും സജ്ജമാണെന്നാണ് ഇതിലൂടെ വ്യക്തമാകുന്നത്. മ്യാന്മറിലും ശ്രീലങ്കയിലും പാകിസ്താനിലും ജിബൂട്ടിയിലും ചൈനക്ക് തുറമുഖങ്ങളുണ്ട്. ഈ സാഹചര്യം മുന്നില് കണ്ടുകൊണ്ടാണ് നാവികസേനയുടെ തയ്യാറെടുപ്പ്.
