മുംബൈ: പീഡനത്തിനിരയായി ഗര്ഭം ധരിക്കേണ്ടിവന്ന കൗമാരക്കാരിയുടെ ഗര്ഭം അലസിപ്പിക്കാന് കോടതി അനുമതി നല്കി. 12 വയസ്സുകാരിയുടെ 23 ആഴ്ചയായ ഗര്ഭം അലസിപ്പിക്കാനാണ് മുംബൈ ഹൈക്കോടതി അനുമതി നല്കിയത്. ജൂണ്മാസം ആദ്യം പെണ്കുട്ടിയുടെ അമ്മ നല്കിയ അപേക്ഷയിലാണ് കോടതി അനുഭാവപൂര്വ്വം നടപടി സ്വീകരിച്ചതെന്ന് വാദി ഭാഗം അഭിഭാഷകന് അറിയിച്ചു.
അയല്പക്കത്തുള്ള ഏതാനും ആളുകള് തന്നെ നിരന്തരം പീഡിപ്പിക്കാറുണ്ടായിരുന്നു എന്ന് പെണ്കുട്ടി മൊഴി നല്കിയിരുന്നു. തുടര്ന്നുള്ള പരിശോധനയിലാണ് പെണ്കുട്ടി ഗര്ഭിണിയാണെന്നും 23 ആഴ്ചയായെന്നും പരിശോധനയില് തെളിഞ്ഞതായി പോലീസ് പറഞ്ഞു. സാംഗ്ലി പോലീസ് സ്റ്റേഷനില് പെണ്കുട്ടിയുടെ അമ്മ പരാതി നല്കിയതിനെ തുടര്ന്നാണ് പോലീസ് കേസ്സെടുത്തത്. ജൂണ് 16നാണ് കുട്ടിയെ ജില്ലാ സര്ക്കാര് ആശുപത്രിയില് പ്രവേശിപ്പിച്ചത്. 20 ആഴ്ചകള് കഴിഞ്ഞതിനാല് ഗര്ഭം അലസിപ്പിക്കാന് കോടതിയുടെ അനുവാദം വേണമെന്ന ആശുപത്രി അധികൃതരുടെ ആവശ്യം അനുസരിച്ചാണ് കോടതി കേസ്സ് പരിഗണിച്ചത്.
ഗര്ഭം പൂര്ണ്ണമായും ധരിക്കുകയും തുടര്ന്ന് പ്രസവസമയത്ത് സംഭവിക്കാന് സാധ്യതയുള്ള വിഷമങ്ങളും താങ്ങാന് ഒരു 12 വയസ്സുകാരിക്ക് സാധിക്കില്ലെന്നും കോടതി ഉത്തരവില് വ്യക്തമാക്കി. ജസ്റ്റിസ് നിതിന് ജാംദാര്, ജസ്റ്റിസ് സുരേന്ദ്ര താവഡെ എന്നിവരുടെ ബഞ്ചാണ് കേസ്സില് വിധിപറഞ്ഞത്. മിറാജ് മെഡിക്കല് കോളേജില് വച്ച് ജൂലൈ 6-ാം തീയതി ഗര്ഭം അലസിപ്പിക്കാനുള്ള ചികിത്സ നടത്താനും കോടതി ജില്ലാ ആരോഗ്യവകുപ്പിന് നിര്ദ്ദേശം നല്കി.