സതാംപ്ടണ്: കൊറോണകാലത്തെ ആദ്യ ക്രിക്കറ്റ് പരമ്പരയ്ക്ക് നനഞ്ഞ തുടക്കം. ഇന്നലെ സതാംപ്ടണിലെ ഏജെസ് ബൗള് സ്റ്റേഡിയത്തിലാരംഭിച്ച ആദ്യ ടെസ്റ്റിനാണ് മഴ വില്ലനായത്. ആദ്യ ദിവസം ഇന്ത്യന് സമയം 3 മണിക്ക് ആരംഭിക്കേണ്ട മത്സരം 2 മണിക്കൂര് വൈകി മാത്രമാണ് തുടങ്ങിയത്. വെളിച്ചക്കുറവും കളി വെറും 17.4 ഓവറുകളില് ഒതുക്കി. ബാറ്റിംഗിനിറങ്ങിയ ഇംഗ്ലണ്ട് ആകെ ചേര്ത്തത് ഒരു വിക്കറ്റ് നഷ്ടത്തില് 35 റണ്സ് മാത്രം.
ടോസ്സ് നേടിയ ആതിഥേയര് ബാറ്റിംഗ് തിരഞ്ഞെടുത്തു. ഓപ്പണര്മാരായി റോറി ബേണ്സും ഡോം സിബ്ലിയുമാണ് ഇറങ്ങിയത്. കളിയുടെ രണ്ടാം ഓവറില്ത്തന്നെ വിന്ഡീസ് നിര ഇംഗ്ലണ്ടിന് ആദ്യ നഷ്ടം വരുത്തി. സിബ്ലി റണ്സൊന്നും എടുക്കാതെയാണ് മടങ്ങിയത്. ഗബ്രിയേല് ക്ലീന്ബൗള്ഡാക്കുകയായിരുന്നു. ബേണ്സ് 55 പന്തുകളില് 20 റണ്സും ഡെന്ലി 48 പന്തുകളില് 14 റണ്സുമെടുത്ത് ക്രീസിലുണ്ട്. രണ്ടു റണ്സിന് താഴെ ശരാശരിയില് കളി ആദ്യദിനം വിരസമാവുകയും ചെയ്തു.
വിന്സീസിനായി കീമര് റോച്ച് 6 ഓവറുകളില് 4 ലും മെയ്ഡനാക്കി മികച്ച തുടക്കമാണ് നല്കിയത്. ആകെ വിട്ടുനല്കിയത് രണ്ടു റണ്സുമാത്രം. ഗാബ്രിയേല് ചരിത്ര ടെസ്റ്റില് ആദ്യ വിക്കറ്റ് നേട്ടത്തിനുടമയുമായി. 5 ഓവറുകള് എറിഞ്ഞ് ഒരു മെയ്ഡനും 19 റണ്സും നല്കി. അല്സാരി ജോസഫ് 3.4 ഓവറുകളില് ഒരു മെയ്ഡനും 11 റണ്സും വിട്ടുനല്കിയപ്പോള് ജാസണ് ഹോള്ഡര് 3 ഓവറുകളില് ഒരു മെയ്ഡനും 3റണ്സും നല്കി.