ലണ്ടന്‍: വര്‍ണ്ണവിവേചനം മാനസികവും ശാരീരികവുമായിതളര്‍ത്തിയെന്ന ആരോപണ വുമായി ഒളിമ്പിക്‌സ് താരങ്ങള്‍ രംഗത്ത്. ബ്രിട്ടണിലെ ഒളിമ്പിക്‌സ് ജിംനാസ്റ്റിക്‌സ് താരങ്ങളായ കറുത്തവര്‍ഗ്ഗവിഭാഗത്തില്‍പെട്ട ബെക്കിയും എല്ലി ഡൗണിയുമാണ് രംഗത്തുവന്നിരിക്കുന്നത്. അമേരിക്കയിലെ ജോര്‍ജ്ജ് ഫ്‌ലോയിഡ് കൊലപാതകത്തെ തുടര്‍ന്ന് നടക്കുന്ന ആഗോള പ്രതിഷേധത്തിലെ ഏറ്റവും പുതിയ വെളിപ്പെടുത്തലാണ് ജിംനാസ്റ്റിക് താരങ്ങള്‍ നടത്തിയിരിക്കുന്നത്. മുന്നേ വെസ്റ്റിന്‍ഡീസ് ക്രിക്കറ്റ് താരം ഡാരെന്‍ സമിയും ഗെയിലുമടക്കം രംഗത്തുവന്നിരുന്നു.
തങ്ങള്‍ക്ക് വലിയതോതിലുള്ള ഒരുതരം സാംസ്‌കാരികമായ ഭയം പിടികൂടിയിരിക്കു കയാണെന്നാണ് ജിംനാസ്റ്റിക്‌സ് വനിതാ താരങ്ങള്‍ വിശേഷിപ്പിച്ചത്. മുന്നേ തങ്ങള്‍ക്ക് പലതും പുറത്തുപറയാന്‍ പ്രയാസമായിരുന്നു. അവസരങ്ങള്‍ നഷ്ടപ്പെടുമോ എന്ന് എപ്പോഴും ഭയപ്പെട്ടിരുന്നു. ഇരുവരും ലോകചാമ്പ്യന്മാരും നിലവിലെ ബ്രിട്ടീഷ് ഒളിമ്പിക്‌സ് സംഘത്തിലെ സുപ്രധാന താരങ്ങളുമാണ്. തങ്ങള്‍ക്കുണ്ടായ അനുഭവങ്ങളുമായി മാനസികമായി പൊരുത്തപ്പെടാന്‍ പോലും വര്‍ഷങ്ങളെടുത്തെന്നും ബെക്കിയും എല്ലിയും പറഞ്ഞു. ട്വിറ്ററിലൂടെയാണ് ഇരുവരും പ്രതികരിച്ചത്.
ഇരുവരുടേയും വര്‍ണ്ണവെറി ആരോപണങ്ങളെക്കുറിച്ച് അന്വേഷിക്കാന്‍ ബ്രിട്ടീഷ് കായികമന്ത്രാലയം തീരുമാനിച്ചതായാണ് റിപ്പോര്‍ട്ട്. ഇരുവരോടും പരസ്യമായി സംസാരിക്കില്ലെന്നും താരങ്ങളുടെ സ്വകാര്യതയ്‌ക്കും സുരക്ഷിതത്വത്തിനും പ്രാധാന്യം നല്‍കുമെന്നും കായികമന്ത്രാലയം അറിയിച്ചു.
