ന്യൂഡല്ഹി : ബാങ്കുകളെ കബളിപ്പിച്ച് കോടികളുടെ തട്ടിപ്പ് നടത്തിയ സംഭവത്തില് അര്ഡോര് ഗ്രൂപ്പിന്റെ സ്വത്തുക്കള് കണ്ടുകെട്ടി എന്ഫോഴ്സ്മെന്റ്. രാജ്യത്തെ 204.27 കോടി രൂപയുടെ സ്വത്തുക്കളാണ് എന്ഫോഴ്സ്മെന്റ് കണ്ടു കെട്ടിയത്. കള്ളപ്പണം വെളുപ്പിക്കല് നിരോധന നിയമ പ്രകാരമാണ് എന്ഫോഴ്സ്മെന്റിന്റെ നടപടി.
അഹമ്മദാബാദിലെ താല്തേജിലെ എസ്ജി ദേശീയ പാതക്ക് സമീപമുള്ള ഓഫീസ്, അഹമ്മദാബാദിലെ വീട്, വീടിനോട് ചേര്ന്നുള്ള സ്ഥലം, അംബാലിയിലെ സ്ഥലം, ഗോഗുല് ധാമിലെ സ്ഥലം, ബൊഡാക്ദേവിലെ 4 സ്ഥാപനങ്ങള് എന്നിവയാണ് എന്ഫോഴ്സ്മെന്റ് കണ്ടുകെട്ടിയത്്. ഇതിന് പുറമേ ആശ്രം റോഡിലെ എലിസ് പാലത്തിന് സമീപത്തെ ഓഫീസും, സൂറത്തിലെ കൃഷി ചെയ്യാത്ത സ്ഥലവും ഇഡി പിടിച്ചെടുത്തിട്ടുണ്ട്.
ബാങ്കുകളില് നിന്നും പണം തട്ടിയ കേസില് അര്ഡോര് ഗ്രൂപ്പിനെതിരെ വിവിധ അന്വേഷണ സംഘങ്ങള് ആറ് എഫ്ഐആറുകള് രജിസ്റ്റര് ചെയ്തിരുന്നു. ഇതിന്റെ അടിസ്ഥാനത്തിലാണ് എന്ഫോഴ്സ്മെന്റ് കേസ് അന്വേഷണം ആരംഭിച്ചത്. സിബിഐ, എസിബി, എഫ്സി, ബിഎസ് എന്നീ അന്വേഷണ സംഘങ്ങളാണ് അര്ഡോര് ഗ്രൂപ്പിനെതിരെ എഫ്ഐആറുകള് തയ്യാറാക്കിയത്. ഏകദേശം 488 കോടി രൂപയുടെ തട്ടിപ്പ് നടത്തിയിട്ടുണ്ടെന്നാണ് എഫ്ഐആറില് അന്വേഷണ സംഘം പറയുന്നത്. അഡോര് ഗ്രൂപ്പ് അംഗങ്ങളായ ഭരത് ഷാ, ഫെനില് ഷാ, ഗീത്ബെന് ഷാ എന്നിവരാണ് കേസിലെ പ്രതികള്.