സാന്റിയാഗോ: അമേരിക്കയുടെ യുദ്ധക്കപ്പലിന് തീപിടിച്ചതിനെ തുടര്ന്ന് സൈനികര്ക്ക് പരിക്ക് . 61 സൈനികര്ക്ക് പൊള്ളലേറ്റതായാണ് വിവരം. സാന്റിയാഗോ ദ്വീപിലെ കേന്ദ്രത്തില് നിലയുറപ്പിച്ചിരുന്ന കപ്പലിനകത്താണ് തീപിടുത്തമുണ്ടായത്. ദക്ഷിണ കാലിഫോര്ണിയയിലെ പ്രദേശമാണ് സാന്റിയാഗോ. കപ്പലിലെ അപകടത്തെ സംബന്ധിച്ച് നാവികസേനയുടെ പ്രത്യേക ആക്രമണവിഭാഗം മേധാവി റിയര് അഡിമിറല് ഫിലിപ്പ് സോബെക്കാണ് വിവരങ്ങള് കൈമാറിയത്.
ആകെ കപ്പലിലുണ്ടായിരുന്ന 38 അമേരിക്കന് നാവിക സേനാംഗങ്ങള്ക്കും അല്ലാത്ത 23 ജീവനക്കാര്ക്കുമാണ് പരിക്കേറ്റിരിക്കുന്നത്. ശക്തമായ ചൂടും പുകയുമാണ് നിരവധി പേര്ക്ക് അപകടം ഉണ്ടാകാന് കാരണമായത്. എല്ലാവര്ക്കും ചികിത്സ കപ്പലില് വച്ചു തന്നെ നല്കിയെന്നും ആരേയും ആശുപത്രിയിലേക്ക് മാറ്റിയിട്ടില്ലെന്നും സൈന്യം അറിയിച്ചു. തീപിടുത്ത കാരണത്തിന്റെ അന്വേഷണം ആരംഭിച്ചതായും നാശനഷ്ടങ്ങളുടെ കണക്കെടുക്കുകയാണെന്നും അഡ്മിറല് സോബെക് അറിയിച്ചു. കപ്പലിലെ ഇന്ധന ടാങ്കിലേയ്ക്ക് തീ പടരാതെ തടയാന് സാധിച്ചത് വലിയ അപകടം ഒഴിവാക്കിയെന്നും സോബെക് പറഞ്ഞു. സാന്റിയാഗോയില് അറ്റകുറ്റപ്പണി നടത്തിക്കൊണ്ടിരുന്ന കപ്പലിലാണ് തീപിടുത്തമുണ്ടായത്. ആകെ 160 സൈനികരാണ് കപ്പലില് അപകട സമയത്ത് ഉണ്ടായിരുന്നത്.