ഹൈദരാബാദ്: വ്യത്യസ്തമായൊരു പിറന്നാള്‍ ആഘോഷത്തിനാണ് ഹൈദരാബാദിലെ നെഹ്‌റു സുവോളജിക്കല്‍ പാര്‍ക്ക് ഇന്ന് സാക്ഷിയായത്. ഒരു അപൂര്‍വ്വ പിറന്നാളാഘോഷം തന്നെയാണ് ഇന്ന് മൃഗശാലയില്‍ സംഘടിപ്പിച്ചത്. സൂസി എന്ന ചിമ്പാന്‍സിയാണ് പിറന്നാളുകാരി. തന്റെ 34-ാമത് പിറന്നാളാണ് സൂസി ഇന്ന് ആഘോഷിച്ചത്.
കേക്ക് മുറിച്ചായിരുന്നു പിറന്നാള്‍ ആഘോഷം. കൊറോണ മാര്‍ഗ നിര്‍ദ്ദേശങ്ങളെല്ലാം പാലിച്ചായിരുന്നു ആഘോഷങ്ങളെന്ന് മൃഗശാല അധികൃതര്‍ വ്യക്തമാക്കി. പഴങ്ങള്‍ നിറച്ച കേക്കായിരുന്നു സൂസിക്ക് പിറന്നാള്‍ സമ്മാനമായി അധികൃതര്‍ ഒരുക്കിയിരുന്നത്. മൃഗശാല അധികൃതര്‍ തന്നെയാണ് കേക്ക് തയ്യാറാക്കിയത്. വ്യത്യസ്ത തരത്തിലുള്ള പഴങ്ങളും പച്ചക്കറികളും ബ്രെഡ്ഡും ഉപയോഗിച്ചാണ് കേക്ക് തയ്യാറാക്കിയത്.
2011 ലാണ് സൂസി എന്ന ചിമ്പാന്‍സിയെ സഹാറ ഗ്രൂപ്പ് നെഹ്‌റു സുവോളജിക്കല്‍ പാര്‍ക്കിന് സമ്മാനിക്കുന്നത്. പിന്നീട് ഇതുവരെ മൃഗശാല അധികൃതരുടെ പരിചരണത്തിലാണ് സൂസി കഴിഞ്ഞത്. മൃഗശാലയിലെ എല്ലാവരുടെയും പ്രിയപ്പെട്ടവളാണ് സൂസി. പിറന്നാളാഘോഷിക്കുന്ന സൂസിയുടെ ചിത്രങ്ങള്‍ ഇതിനോടകം തന്നെ സാമൂഹ്യ മാദ്ധ്യമങ്ങളില്‍ വൈറലായിരിക്കുകയാണ്.
