മാഡ്രിഡ്: റയല് മാഡ്രിഡിന് ലാ ലീഗ കിരീടം. ഇന്നലെ നടന്ന മത്സരത്തില് ജയിച്ചതോടെ ബാഴ്സലോണയേക്കാള് ഏഴു പോയിന്റുകളുടെ വ്യത്യാസത്തിലാണ് കിരീടം സ്വന്തമാക്കി യത്. വമ്പന് താരങ്ങളുടെ ഒറ്റയാള് പ്രകടനമില്ലാതെ സെര്ജിയോ റാമോസിന്റെ നേതൃത്വത്തിലാണ് സീസണില് റയലിന്റെ മുന്നേറ്റം. സിനദിന് സിദാനെന്ന കരുത്തനായ പരിശീലകന്റെ കീഴിലാണ് റയല് സ്പാനിഷ് ലീഗില് ചാമ്പ്യന്മാരായത്. ജയത്തോടെ ബെര്ണാബ്യൂവിലേയ്ക്ക് എത്തിയത് 34-ാമത്തെ ലാ ലീഗ കിരീടമാണ്. റയലിന് വിവിധ മത്സരങ്ങളിലായി 11 കിരീടങ്ങളാണ് പരിശീലകനെന്ന നിലയില് സിദാന് നേടിക്കൊടുത്തിരിക്കുന്നത്. 12 വര്ഷങ്ങള്ക്കിടെ ആകെ 3 തവണയാണ് റയലിന് ലീഗ് കിരീടം നേടാനായത്. എന്നാല് 2013നും 18നുമിടയില് റയല് നാല് ചാമ്പ്യന്സ് ലീഗ് കിരീടങ്ങളും സ്വന്തമാക്കിയിരുന്നു.
റയല് ഇന്നലെ വിയ്യാറയലിനെ ഒന്നിനെതിരെ രണ്ടു ഗോളുകള്ക്ക് ജയിക്കുകയും ബാഴ്സലോണ അതേ ഗോള് വ്യത്യാസത്തില് ഒസാസുനയോട് തോല്ക്കുകയും ചെയ്തതോടെയാണ് കിരീടം റയലിന് സ്വന്തമായത്. തുടര്ച്ചയായ 10 കളികളില് റയല് ജയിച്ച് മുന്നേറിയപ്പോള് ബാഴ്സ ഒരു തോല്വിയും 3 സമനിലകളും വഴങ്ങി പിന്നാക്കം വീഴുകയായിരുന്നു. ലീഗില് ഇനി ഒരു മത്സരം ബാക്കിനില്ക്കേ റയലിന് 86 പോയിന്റാണുള്ളത്.
വിയ്യാറയലിനെതിരെ ബെന്സേമയുടെ ഇരട്ട ഗോളുകളാണ് റയലിന് കരുത്തായത്. 29-ാം മിനിറ്റിലാണ് കരീം ബെന്സേമ ആദ്യ ഗോള് നേടിയത്. ലൂക്കാ മോഡ്രിച്ചിന്റെ പാസ്സാണ് ബെന്സേമ ഗോളാക്കിയത്. തുടര്ന്ന് 77-ാം മിനിറ്റില് ലഭിച്ച പെനാല്റ്റിയും ബെന്സേമ തന്നെ വലയിലെത്തിച്ചു. അവസാന നിമിഷങ്ങള് ചില ഉശിരന് നീക്കങ്ങള് വിയ്യാറയലും നടത്തി. 83-ാം മിനിറ്റിലാണ് മികച്ച ഹെഡറിലൂടെ വിസെന്റേ ഇബ്ബോറ ആശ്വാസ ഗോള് നേടിയത്. റയലിന് ഇനി അവശേഷിക്കുന്ന മത്സരം ലിഗാനെസിനെതിരെ തിങ്കളാഴ്ചയാണ്.