കോട്ടയം: മലയാള മനോരമയുടെ മുന് സീനിയര് ഫോട്ടോഗ്രാഫര് പി.ആര്. ദേവദാസ് (70) അന്തരിച്ചു. പാറമ്പുഴ മോസ്കോ കവലയ്ക്ക് സമീപത്തെ വൈഷ്ണവം എാണ് വീട്ടുപേര്. നാല് പതിറ്റാണ്ടിനടുത്ത് മാധ്യമരംഗത്ത് ക്യാമറയിലൂടെ ചരിത്ര മുഹൂര്ത്തങ്ങള് പകര്ത്തിയ ദേവദാസിന്റെ വിയോഗം മാധ്യമലോകത്തിന് വലിയ നഷ്ടമായിരിക്കുകയാണ്.
മൃതദേഹം ഇന്ന് (ബുധനാഴ്ച) രാവിലെ 7 മണിക്ക് പാറമ്പുഴ മോസ്കോ കവലയിലെ വസതിയിലെത്തിക്കും. തുടര്ന്ന് രാവിലെ 10.30-ന് കോട്ടയം പ്രസ് ക്ലബ് അങ്കണത്തില് പൊതുദര്ശനത്തിന് വയ്ക്കും. അവിടെ നിന്ന് 11.30-ഓടെ കുമാരനല്ലൂരിലെ സഹോദരന് പി.ആര്. ശശിധരന്റെ (എക്സൈസ് പെന്ഷനേഴ്സ് അസോസിയേഷന് ജില്ലാ പ്രസിഡന്റ്) ശ്രീലക്ഷ്മി ഭവനിലേക്ക് കൊണ്ടുപോകും.
സംസ്കാരം വൈകിട്ട് 3 മണിക്ക് വിജയപുരം ഗ്രാമപഞ്ചായത്തിലെ മന്ദിരം കവലയ്ക്ക് സമീപമുള്ള ചിലമ്പ്രക്കുന്ന് ശാന്തിപഥം ശ്മശാനത്തില് നടക്കും.
1980-ല് മലയാള മനോരമയുടെ എഡിറ്റോറിയല് വിഭാഗത്തില് സ്റ്റുഡിയോ ഡാര്ക് റൂം അസിസ്റ്റന്റായാണ് ദേവദാസ് ഔദ്യോഗിക ജീവിതം ആരംഭിച്ചത്. തുടര്ന്ന് കണ്ണൂര്, തിരുവനന്തപുരം, കോട്ടയം യൂണിറ്റുകളിലായി 37 വര്ഷം സേവനമനുഷ്ഠിച്ച അദ്ദേഹം 2017-ല് കോട്ടയം യൂണിറ്റില് നിന്നാണ് വിരമിച്ചത്.
ഫോട്ടോ ജേര്ണലിസത്തില് നല്കിയ മികച്ച സംഭാവനകള്ക്ക് സ്വദേശാഭിമാനി അവാര്ഡ്, കണ്ണൂര് പ്രസ് ക്ലബ്ബിന്റെ പാമ്പന് മാധവന് സ്മാരക അവാര്ഡ്, സംസ്ഥാന ഗുസ്തി ചാമ്പ്യന്ഷിപ്പ് ഫോട്ടോ അവാര്ഡ് ഉള്പ്പെടെ നിരവധി പുരസ്കാരങ്ങള് അദ്ദേഹത്തെ തേടിയെത്തിയിരുന്നു.
ഭാര്യ: കെ.കെ. ശൈലജ (കുടമാളൂര് പുളിഞ്ചുവട് കുന്നുംപുറത്ത്). മക്കള്: വിഷ്ണു ദാസ് (ഫ്രീലാന്സ് ഫോട്ടോഗ്രാഫര്), ദേവിക ദാസ് (എന്ജിനീയര്, ബെംഗളൂരു).
