മാഞ്ചസ്റ്റര്: രണ്ടാം ടെസ്റ്റില് ഇംഗ്ലണ്ടിന് മികച്ച തുടക്കം. വെസ്റ്റിന്ഡീസിന് ടോസ് കിട്ടിയ രണ്ടാം ടെസ്റ്റില് ബാറ്റിംഗിനയക്കപ്പെട്ട ഇംഗ്ലണ്ട് ഇന്നലെ കളിനിര്ത്തുമ്പോള് 3 വിക്കറ്റിന് 207 റണ്സ് എന്ന മികച്ച നിലയിലാണ്. 86 റണ്സുമായി ഡോം സിബ്ലിയും 59 റണ്സുമായി ബെന് സ്റ്റോക്സുമാണ് ക്രിസിലുള്ളത്. ഓപ്പണര് റോറി ബേണ്സ്(15), സാക് ക്രോളീ(0), ക്യാപ്റ്റന് ജോ റൂട്ട്(23) എന്നിവരാണ് പുറത്തായത്. ആദ്യ രണ്ടു പേരേയും ചേയ്സാണ് പുറത്താക്കിയത്. സ്കോര് 29ല് നില്ക്കേയാണ് ബേണ്സ് വിക്കറ്റിന് മുന്നില് കുടുങ്ങി ചെയ്സിന് ആദ്യവിക്കറ്റ് സമ്മാനിച്ചത്. തുടര്ന്ന് ക്രോളി തൊട്ടടുത്ത പന്തില് ഹോള്ഡര് പിടിച്ച് പുറത്തായി.
തുടര്ന്ന് സിബ്ലിയും(86) ക്യാപ്റ്റന് ജോ റൂട്ടും(23) ചേര്ന്ന് മൂന്നാം വിക്കറ്റില് 52 റണ്സ് ചേര്ത്തു. റൂട്ടിനെ ജോസെഫിന്റെ പന്തില് ഹോള്ഡര് പിടിച്ചു പുറത്താക്കി. പിന്നീടെത്തിയ സ്റ്റോക്സ് ആദ്യ ടെസ്റ്റിലെ പോലെ സ്ഥിരതയാര്ന്ന ബാറ്റിംഗാണ് പുറത്തെടുത്തത്. ബേണ്സുമൊത്ത് സെഞ്ച്വറി കൂട്ടുകെട്ട് ഉണ്ടാക്കി പുറത്താകാതെ നില്ക്കുകയാണ് സ്റ്റോക്സ് .
കരീബിയന് നിരയില് ഇംഗ്ലണ്ടിന്റെ രണ്ടു വിക്കറ്റുകള് വീഴ്ത്തിയത് ചെയ്സാണ്. 16 ഓവറില് 53 റണ്സിനാണ് രണ്ടും മുന്നിരക്കാരെ ചെയ്സ് പുറത്താക്കിയത്. ജോസഫാണ് മൂന്നാം വിക്കറ്റ് നേടിയത് . 15 ഓവറില് 41 റണ്സിനാണ് ഇംഗ്ലീഷ് ക്യാപ്റ്റനെ ജോസഫ് പുറത്താക്കിയത്.
