ഒരാളുടെ ആരോഗ്യം കണക്കാക്കുന്നതിൽ ഉറക്കത്തിനുള്ള സ്ഥാനം എടുത്ത് പറയേണ്ടത് തന്നെയാണ്. പല അസുഖങ്ങളിൽ നിന്നും നമ്മെ രക്ഷിക്കാനും ഉറക്കത്തിന് സാധിക്കും. തലച്ചോറിന്റെ പ്രവർത്തനവും ദഹനവും നല്ല രീതിയിൽ നടക്കുന്നതിനും സുഖനിദ്ര അത്യാവശ്യമാണ്. രോഗപ്രതിരോധശേഷിയും വർധിപ്പിക്കുന്നു.
ചില ഭക്ഷണങ്ങൾക്ക് ഉറക്കത്തെ പ്രോത്സാഹിപ്പിക്കാനുള്ള ശേഷിയുണ്ട്. അതിനാൽ തന്നെ സുഖനിദ്രയ്ക്ക് വേണ്ടി ഇത്തരം ഭക്ഷണങ്ങൾ കഴിക്കുന്നത് നന്നായിരിക്കും.
ഊർജത്തിന്റെയും ആരോഗ്യത്തിന്റെയും ഉറവിടം എന്ന് തന്നെ നമുക്ക് ബദാമിനെ വിശേഷിപ്പിക്കാം. ഇതിൽ അടങ്ങിയിരിക്കുന്ന മഗ്നീഷ്യം ഉറക്കം ഉണ്ടാകാൻ കാരണമാകുന്നു. കൂടാതെ, ഉറക്കത്തെ തടസ്സപ്പെടുത്തുന്ന കോർട്ടിസോൾ എന്ന സ്ട്രെസ് ഹോർമോണിന്റെ അളവ് കുറയ്ക്കുകയും ചെയ്യുന്നു. ഉറങ്ങാൻ പോകുന്നതിന് മുൻപ് ഒരു പിടി ബദാം അല്ലെങ്കിൽ 28ഗ്രാം ബദാം കഴിക്കുന്നത് ഉത്തമം.
ട്രിപ്റ്റോഫാന്റെ നല്ലൊരു ഉറവിടം ആണ് മുട്ടകൾ. തേൻ ചേർത്തുള്ള ഒരു കപ്പ് ചായയ്ക്കൊപ്പം പുഴുങ്ങിയ മുട്ട കഴിക്കുന്നത് നല്ലതാണ്.ഉയർന്ന അളവിൽ കാൽസ്യം അടങ്ങിയിരിക്കുന്നതിനാൽ ഉറക്കത്തിന് ഗുണം ചെയ്യുന്ന ഒന്നാണ് ഇലക്കറികൾ.
മെലറ്റോണിൻ അടങ്ങിയിരിക്കുന്ന ഒരു പഴത്തിന്റെ ഉദാഹരണം ആണ് മുന്തിരി. മുന്തിരി ഉറക്കത്തിന് സഹായിക്കുമെങ്കിലും മുന്തിരി വീഞ്ഞ് ഉറക്കത്തിന് കാരണമാകുന്നില്ല.
കാർബോഹൈഡ്രേറ്റ് കൂടുതലായി അടങ്ങിയിരിക്കുന്ന ഭക്ഷണപദാർഥങ്ങൾ കഴിക്കുന്നത് നല്ലതാണ്. കൊഴുപ്പ് കൂടുതലുള്ളവ കഴിക്കാതിരിക്കുക.
എല്ലാ ഭക്ഷണങ്ങളും ഉറക്കത്തിന് സഹായിക്കില്ല. ചില ഭക്ഷണങ്ങൾ ഉറക്കം വരാതിരിക്കാനും കാരണമാകും. കഫീൻ കൂടുതലായി അടങ്ങിയിട്ടുള്ള ഡാർക്ക് ചോക്ലേറ്റ് തന്നെയാണ് ഇതിനുള്ള ആദ്യത്തെ ഉദാഹരണം. ഡാർക്ക് ചോക്ലേറ്റ് കൂടാതെ പാൽക്കട്ടി, തക്കാളി എന്നിവയും ഉറക്കത്തെ പ്രതികൂലമായി ബാധിക്കുന്ന വസ്തുക്കൾ ആണ്. തക്കാളിയിൽ ഉയർന്ന അളവിൽ ടൈറാമിൻ അടങ്ങിയിട്ടുള്ളതിനാൽ തലച്ചോറിന്റെ പ്രവർത്തനത്തെ ഉത്തേജിപ്പിക്കുകയും ഇത് ഉറക്കം വരാതിരിക്കാൻ കാരണമാവുകയും ചെയ്യുന്നു.
