ന്യൂഡല്ഹി: ക്രിക്കറ്റ് മത്സരങ്ങള് ആഭ്യന്തരമായി നടത്തുന്നതുമായി ബന്ധപ്പെട്ട് ബി.സി.സി.ഐയുടെ പച്ചക്കൊടി. പരിശീലനങ്ങളും തുടര്ന്ന് ഘട്ടംഘട്ടമായി മത്സരങ്ങളും തിരികെ കൊണ്ടുവരാനുള്ള സുചനയാണ് ക്രിക്കറ്റ് ബോര്ഡ് നല്കിയിരിക്കുന്നത്. പരിശീലനത്തിനും കളികള്ക്കുമായുള്ള കൊറോണ മാര്ഗ്ഗനിര്ദ്ദേശമാണ് ബോര്ഡ് വിശദമാക്കിയത്.
പരിശീലന ക്യാമ്പില് 60 വയസ്സുകഴിഞ്ഞയാരും നിലവിലെ ഒരു പ്രവര്ത്തനത്തിലും പങ്കെടുക്കരുതെന്നതാണ് ഏറെ പ്രസക്തമായ ഒരു നിര്ദ്ദേശം. ബി.സി.സി.ഐ സ്റ്റാന്ഡേര്ഡ് ഓപ്പറേഷണല് പോളിസി എന്ന നിലയിലാണ് നിര്ദ്ദേശം നല്കിയിരിക്കുന്നത്.
ആദ്യഘട്ടം എന്ന നിലയില് എല്ലാ ആഭ്യന്തര ക്രിക്കറ്റ് താരങ്ങളും സമ്മത പത്രം ഒപ്പിടണമെന്നതാണ് ഒന്നാമത്തെ വ്യവസ്ഥ. അതുപ്രകാരം പരിശീലനവുമായി ബന്ധപ്പെട്ട എല്ലാ കാര്യങ്ങളിലും തങ്ങള് ഉത്തരവാദിയായിരിക്കും, ആരോഗ്യം, സുരക്ഷ എന്നീ കാര്യത്തിലെ ശ്രദ്ധയും സ്വന്തം ഉത്തരവാദിത്വമായി മാറും. രണ്ടാമത്തെ വ്യവസ്ഥ പ്രായത്തെ സംബന്ധിച്ചാണ്. 60 വയസ്സുകഴിഞ്ഞവര് പരിശീലകര്, ഒഫീഷ്യല്സ്, ഗ്രൗണ്ട്സ്റ്റാഫ് എന്നീ നിലകളിലൊന്നും പങ്കെടുക്കാനും വരാനും പാടില്ല.
യാത്രയില് പാലിക്കേണ്ട ആരോഗ്യരക്ഷയെ സംബന്ധിച്ചാണ് മൂന്നാമത്തെ നിര്ദ്ദേശം. എല്ലാ അസോസിയേഷനുകളും താരങ്ങളുടെ 2 ആഴ്ചത്തെ മുഴുവന് യാത്രാവിവരങ്ങളും ഓണ്ലൈനായി ശേഖരിക്കണം, ക്യാമ്പിലെത്തുന്ന ദിവസവും മൂന്നാം ദിവസവും കൊറോണ പരിശോധന നടത്തണം എന്നും പറഞ്ഞിട്ടുണ്ട്. പരിശോധനകള് നെഗറ്റീവായാല് മാത്രമേ ക്യാമ്പില് പരിശീലനം നടത്താന് അനുവദിക്കാവൂ എന്നും ബോര്ഡ് അറിയിച്ചു. താരങ്ങള്ക്കൊപ്പം ബന്ധുക്കളോ സുഹൃത്തുക്കളോ വരാന് പാടില്ലെന്നും പരിശീലനത്തിനിടെ പന്തില് ഉമിനീര് പുരട്ടാന് പാടില്ലെന്ന പുതിയ തീരുമാനവും ബോര്ഡ് വീണ്ടും ഓര്മ്മിപ്പിച്ചു.
