കൊറോണ വ്യാപനത്തെ തുടര്‍ന്ന് ലോകം മുഴുവന്‍ സ്തംഭിച്ചിരിക്കുകയാണ്. എല്ലാവരും വീട്ടില്‍ തന്നെ കുടുങ്ങിയിട്ട് മാസങ്ങളായി. ബഹുഭൂരിപക്ഷം ആളുകളും വീട്ടില്‍ നിന്നാണ് ജോലി ചെയ്യുന്നത്. ഇപ്പോഴാണ് പലര്‍ക്കും വീട്ടില്‍ എന്തുമാത്രം ജോലിയുണ്ടെന്ന് മനസിലാകുന്നത്. വ്യക്തിജീവിതവും തൊഴില്‍ജീവിതവും തമ്മില്‍ ആകെ കുഴഞ്ഞുമറിഞ്ഞിരിക്കുകയാണ് പലരും.
ഓഫീസില്‍ പോവുകയാണെങ്കില്‍ കൃത്യമായി ഉറങ്ങി എഴുന്നേറ്റ് കാര്യങ്ങള്‍ ചെയ്തിരുന്ന പലരും ഈ ദിവസങ്ങളില്‍ വൈകി ഉറങ്ങി വൈകി എഴുന്നേല്‍ക്കുന്നതിനാല്‍ ഓഫീസ് ജോലിയും വീട്ടുജോലിയും എല്ലാം അനിശ്ചിതത്വത്തിലാണ്. ഈയവസരത്തിലാണ് ചില ജീവനക്കാരുടെ ചില കുസൃതികളും. ഈ സമയത്ത് ആളുകള്‍ ലീവ് ചോദിക്കുന്നതിനുള്ള കാരണങ്ങള്‍ പറയുന്നത് ഇത്തരത്തിലായിരിക്കുമെന്ന് പറഞ്ഞ് ചില ഉദാഹരണങ്ങള്‍ ഇവര്‍ പങ്കുവെക്കുന്നു. അതില്‍ ഏറ്റവും മുന്നില്‍ നില്‍ക്കുന്നത് നെറ്റ്ഫ്‌ളിക്‌സ് തന്നെയാണ്. കാരണം മിക്കവരും ഇപ്പോള്‍ നെറ്റ്ഫ്‌ളിക്‌സിലെ വെബ് സീരീസിന് പിന്നാലെയാണ്.
തമാശ നിറഞ്ഞ ആ ലീവ് കാരണങ്ങള്‍ ഇവയൊക്കെയാണ്
* നെറ്റ്ഫ്‌ലിക്‌സിലെ ഏറ്റവും പുതിയ സീരീസ് കാണുന്നതിന് ഞാന്‍ രാത്രി മുഴുവന്‍ ചെലവഴിച്ചു, പകല്‍ മുഴുവന്‍ പ്രവര്‍ത്തിക്കാനുള്ള ശേഷി എനിക്കില്ല. എനിക്ക് ഇന്ന് അവധി തരാമോ?
* ഞാന്‍ എല്ലായ്‌പ്പോഴും ഫോണിലും ലാപ്ടോപ്പിലുമാണെന്നാണ് എന്റെ കുട്ടികളുടെ പരാതി. ജോലിയും പ്രധാനമാണെന്ന് അവരോട് വിശദീകരിക്കാന്‍ എനിക്ക് ഒരു ദിവസം ആവശ്യമാണ്, അതിനാല്‍ ഇന്ന് അവധി അനുവദിക്കണം
* ഈ ദിവസങ്ങളില്‍ നായയെ പുറത്ത് നടക്കാന്‍ കൊണ്ടുപോകാന്‍ എനിക്ക് കഴിഞ്ഞിട്ടില്ല, മാത്രമല്ല സാധാരണപോലെ നായ്ക്കുട്ടിക്കൊപ്പം സമയം ചെലവഴിക്കാനും കഴിയുന്നില്ല. എനിക്ക് ഇന്ന് അവധി എടുക്കാമോ?
* വീട്ടുജോലിക്കാര്‍ ഇപ്പോള്‍ വരണില്ല. പാചകം ചെയ്യാന്‍ എനിക്ക് വല്യ പിടിയില്ല. എനിക്കും എന്റെ കുടുംബത്തിനും എങ്ങനെ ഭക്ഷണം ഉണ്ടാക്കാമെന്ന് യൂട്യൂബ് നോക്കി പഠിക്കണം. ഒരു ദിവസം അവധി ആവശ്യമാണ്.
* ഞാന്‍ ഈയിടെ നന്നായി ഉറങ്ങുന്നില്ല, കുറച്ചൊന്ന് ഉറങ്ങാന്‍ ആഗ്രഹിക്കുന്നു. ദയവായി എനിക്ക് ഇന്ന് ഓഫ് തരുമോ?
* പുറത്തു നിന്ന് ഒരാള്‍ വന്ന് എന്റെ വാഷിംഗ് മെഷീന്‍ ശരിയാക്കി. ഞാന്‍ ആകെ പരിഭ്രമത്തിലാണ്. വീട് മുഴുവന്‍ വൃത്തിയാക്കേണ്ടതുണ്ട്. ഇതിനായി ഇന്ന് ഒരു ദിവസം അവധി എടുക്കുന്നു.
* എന്റെ അടുക്കളയിലെ ടാപ്പ് തകര്‍ന്നു. വീടിന്റെ പകുതിയോളം വെള്ളം നിറഞ്ഞിരിക്കുന്നു. പ്ലംബര്‍മാരെയൊന്നും ലഭ്യമല്ലാത്തതിനാല്‍, ഞാന്‍ ഇത് സ്വയം കൈകാര്യം ചെയ്യേണ്ടിവരും. ഒരു ദിവസം അവധി വേണം.
* അയല്‍വാസികള്‍ ഇന്ന് കോവിഡ് ടെസ്റ്റിന് പോകുന്നതിനാല്‍ അവരുടെ കുട്ടിയെ എന്നെയാണ് നോക്കാന്‍ ഏല്‍പ്പിക്കുന്നത്. ജോലിയും കുട്ടിയെ നോക്കലും ഒരുമിച്ച് നടക്കാത്തതിനാല്‍ ഇന്ന് ഒരു ദിവസം അവധി നല്‍കണം.
* അവധിക്കാലം എങ്ങനെയാണെന്ന് പോലും ഇപ്പോള്‍ ഓര്‍മ്മയില്ല. ആയതിനാല്‍ ഇന്ന് ഞാനൊരു അവധിയെടുക്കുന്നു. അസൗകര്യത്തില്‍ ക്ഷമചോദിക്കുന്നു.
