കര്ണാടകയിലെ ഉടുപ്പിയിലാണ് കൊല്ലൂര് മൂകാംബിക ദേവി ക്ഷേത്രം. മൂകാംബിക ദേവിയെ കാണാനായി ക്ഷേത്രത്തില് എത്തുന്ന അധികപേരും സൗപര്ണികയില് മുങ്ങാതെ, കുടജാദ്രി കയറാതെ പോകാറില്ല. അത്രയും മനോഹരവും ദൈവീകവുമാണ് കുടജാദ്രി മലനിരകള്. കുടജാദ്രിയുടെ താഴ്വരയിലാണ് മൂകാംബിക ക്ഷേത്രം എന്നാല് ശ്രീ മൂകാംബിക ദേവിയുടെ മൂലസ്ഥാനമായി കാണപ്പെടുന്ന ഭദ്രകാളി ക്ഷേത്രം കുടികൊള്ളുന്നത് കുടജാദ്രിയിലും. സൗപര്ണിക നദിയുടെ ഉത്ഭവവും കുടജാദ്രി മലനിരകളില് നിന്നു തന്നെ.
കൊല്ലൂര് ക്ഷേത്രത്തിനടുത്തു നിന്നും ജീപ്പുകളിലാണ് കുടജാദ്രിയിലേക്കുള്ള യാത്ര. വളഞ്ഞു പുളഞ്ഞു കിടക്കുന്ന ഇടുങ്ങിയ വഴികള് അതിനിടയില് ചുറ്റിപ്പിണഞ്ഞു കിടക്കുന്ന വള്ളിക്കൂടങ്ങള് കൂടെ മലമുകളില് നിന്നും ഒലിച്ചിറങ്ങുന്ന ചെറിയ ചെറിയ വെള്ളച്ചാട്ടങ്ങളും ചുറ്റുപാടും മൂടിക്കിടക്കുന്ന കോടയും കാണാം. കുറച്ചു ദൂരം മുന്നോട്ട് പോയി കഴിഞ്ഞാല് പിന്നെ വഴി വീണ്ടും പ്രയാസമേറിയതാണ് കല്ലുകളും ചെറു പാറകെട്ടുകളും കുഴികളും നിറഞ്ഞ വഴികള്. പിന്നെയുള്ള വഴികള് നടന്നു കയറണം ചുറ്റിലും പ്രകൃതി എന്ന സുന്ദരിയുടെ മനോഹാരിത വേണ്ടുവോളം ആസ്വദിച്ചു നടക്കാം.
കുടജാദ്രിയുടെ ഏറ്റവും മുകളിലായാണ് ശ്രീശങ്കരാചാര്യര് തപസ്സുചെയ്തിരുന്ന സര്വ്വജ്ഞപീഠം. കല്ലില് കൊത്തിവെച്ച ഈ കാഴ്ച മനസ്സിനെ ഏറെ ആനന്ദകരമാക്കുന്ന ഒന്നാണ്. ആദി മൂകാംബിക ദേവി ക്ഷേത്രവും, ഗണപതി ഭഗവാനെ പ്രതീഷ്ഠിച്ചിരിക്കുന്ന ഗണപതി ഗുഹയും അടുത്തടുത്തായി കാണാം. ഒരുപാട് സിദ്ധന്മാരുടേയും, സന്യാസിമാരുടെയും വാസസ്ഥലം കൂടിയാണ് കുടജാദ്രി മലനിരകള്. ഔഷധസസ്യങ്ങളാല് സമ്പുഷ്ടമാണ് ഇവിടം. കണ്ണിനും മനസ്സിനും ഒരുപോലെ കുളിര്മ നല്കുന്ന കാഴ്ചകളാണ് കുടജാദ്രിയിലുളളത്. നവരാത്രിയാണ് കൊല്ലൂര് മുകാംബിക ക്ഷേത്രത്തിലെ പ്രധാന ആഘോഷം. ദിവസും ഒരുപാട് കുട്ടികള് ആദ്യാക്ഷരം കുറിക്കാനായി ഇവിടെ എത്തുന്നുണ്ട്.
