മരണം വരെയും ധീരതയുടെ മുഖമായി മാറിയിരുന്ന ബാൻഡിറ്റ് ക്വീൻ , ഫൂലൻ ദേവി . ഒരു കാലത്ത് കൊള്ളക്കാരിയായി ജീവിച്ചിരുന്നതിനാലാണ് അവർക്കു ബാൻഡിറ്റ് ക്വീൻ എന്ന പേര് ലഭിച്ചത് . 2001 ജൂലൈ 26 ന് അവർ വെടിയേറ്റ് മരിക്കുമ്പോൾ ലോക്സഭയിലേക്ക് ജനപിന്തുണയോടെ തെരഞ്ഞെടുക്കപ്പെട്ട പ്രതിനിധിയായിരുന്നു .
ഉത്തർ പ്രദേശിലെ , ജലൗൻ ജില്ലയിലെ ഒരു ഗ്രാമത്തിൽ , ദരിദ്രരായിരുന്ന വള്ളക്കാരുടെ കുടുംബത്തിലാണ് ഫൂലൻ ജനിച്ചത് . അവർക്ക് ആകെയുണ്ടായിരുന്നത് പരമ്പരാഗതമായി കിട്ടിയ കുറച്ചു കൃഷി ഭൂമിയായിരുന്നു . ഫൂലന്റെ മുത്തശ്ശന്റെയും മുത്തശ്ശിയുടെയും മരണശേഷം, അവരുടെ അച്ഛന്റെ സഹോദരനും മകനും കൃഷി ഭൂമിയിൽ അധികാരം സ്ഥാപിക്കാൻ ശ്രമിക്കുകയുണ്ടായി. അതിനെ എതിർക്കാൻ ശ്രമിച്ച ഫൂലനെ അവർ നിശ്ശബ്ദയാക്കിയത് ഇഷ്ടിക കൊണ്ടിടിച്ചു ബോധം കെടുത്തിയാണ് .
ഈ സംഭവത്തിന് കുറച്ചു നാളുകൾക്കു ശേഷം ഫൂലന് പതിനൊന്ന് വയസ്സുള്ളപ്പോൾ , നാല്പത്തിയഞ്ചു വയസ്സുള്ള ഒരു വ്യക്തിയുമായി അവരുടെ വിവാഹം നടത്തി. വിവാഹം കഴിച്ചയച്ച ഫൂലൻ , ഭർതൃ കുടുംബത്തിലെ പീഡനം സഹിക്ക വയ്യാതെ തിരിച്ചു വന്നെങ്കിലും മടക്കിയയക്കുകയാണുണ്ടായത് . പിന്നെയും മടങ്ങി വന്ന ഫൂലൻ ഒരു വ്യക്തിയുമായി പ്രണയത്തിലാവുകയും , വിവാഹം കഴിക്കാനായി അയാളോടൊപ്പം ഒളിച്ചോടുകയും ചെയ്തു. എന്നാൽ വിവാഹം ചെയ്യാതെ തിരിച്ചു പോന്ന ഫൂലനെ അച്ഛന്റെ സഹോദരന്റെ മകൻ കള്ള കേസിൽ കുടുക്കി ജയിലേക്കയച്ചു . ജയിൽ മോചിതയായി ഫൂലൻ തിരിച്ചു വന്നപ്പോൾ അറിഞ്ഞത് അച്ഛന്റെ സഹോദരന്റെ മകൻ , തങ്ങളുടെ കൃഷി മുഴുവൻ കത്തിച്ചു ചാമ്പലാക്കി കളഞ്ഞു എന്നതാണ് . ഇതിനു പ്രതികാരമായി ഫൂലൻ അയാളെ കല്ല് കൊണ്ട് മർദ്ധിച്ചവശനാക്കി .
ഇതിന്റെ പ്രതികാരം എന്നോണം അവർ തയ്യാറാക്കിയ പദ്ധതി അനുസരിച്ചു ഫൂലനെ ഒരു കൂട്ടം കൊള്ളക്കാർ തട്ടി കൊണ്ട് പോവുകയും നിരന്തരമായി പീഡിപ്പിക്കുകയും ചെയ്തു. അക്കൂട്ടത്തിൽ ഉണ്ടായിരുന്ന ഒരു കൊള്ളക്കാരനുമായി ഫൂലൻ പ്രണയത്തിലാവുകയും അയാൾ കൊള്ളക്കാരുടെ തലവനെ വധിക്കുകയും ചെയ്തു . ഇതിന്റെ പ്രതിഷേധമായി കൂട്ടത്തിൽ ഉണ്ടായിരുന്ന മറ്റു രണ്ടു കൊള്ളക്കാർ ഫൂലന്റെ കാമുകനെ വധിക്കുകയും , അവരെ മറ്റൊരു സ്ഥലത്ത് കൊണ്ട് പോയി പൂട്ടിയിടുകയും നിരന്തരം പീഡിപ്പിക്കുകയും ചെയ്തു. ഇത്രയും പീഡനങ്ങൾ അനുഭവിച്ചിരുന്ന കാലത്ത് ഫൂലന്റെ പ്രായം വെറും പതിനേഴു വയസ്സായിരുന്നു .
ഒരു രാത്രി ഫൂലൻ അവിടെ നിന്ന് രക്ഷപെടുകയും , ചമ്പൽ കാടുകളിൽ തന്നെയുണ്ടായിരുന്ന മറ്റൊരു കൊള്ളസംഘത്തിൽ ചേരുകയും , അവരോടൊപ്പം ചേർന്ന് തന്നെ നിരന്തരം ഉപദ്രവിക്കുകയും പീഡിപ്പിക്കുകയും ചെയ്ത ഇരുപത്തിരണ്ട് പേരെ വധിക്കുകയുണ്ടായി . അന്ന് മുതൽ തലയ്ക്കു വിലപറഞ്ഞ പിടികിട്ടാപ്പുള്ളിയായി മാറി ഫൂലൻ .
രണ്ടു വർഷത്തിന് ശേഷം ഉപാധികളോടെ ഫൂലൻ പോലീസിന് മുന്നിൽ കീഴടങ്ങി . പതിനൊന്ന് വർഷം ജയിൽ ശിക്ഷ അനുഭവിച്ച ഫൂലന് ബാൻഡ്വിറ്റ് ക്വീൻ ക്വീൻ എന്ന നാമം ലഭിക്കുകയും ധീരതയുടെ പ്രതീകമാവുകയും ചെയ്തിരുന്നു .
രണ്ടു തവണ തെർഞ്ഞെടുപ്പിൽ മത്സരിച്ചു ലോക്സഭയിലെത്തിയ ഫൂലൻ , മുഖം മൂടി ധരിച്ച മൂന്ന് ആയുധധാരികൾ ഉതിർത്ത വെടിയേറ്റ് ഡൽഹിയിലുള്ള തന്റെ വസതിക്കു മുന്നിൽ വെച്ച് കൊല്ലപ്പെടുകയായിരുന്നു .
