കെ. ആസിഫ് സംവിധാനം ചെയ്ത് ഷാപൂർജി പല്ലോഞ്ചി നിർമ്മിച്ച 1960 ലെ ഇന്ത്യൻ ഇതിഹാസ ചിത്രമാണ് മുഗൾ-ഇ-ആസാം . പൃഥ്വിരാജ് കപൂർ , ദിലീപ് കുമാർ , മധുബാല എന്നിവർ അഭിനയിച്ച ചിത്രം ആ കാലഘട്ടത്തിലെ ഏറ്റവും മികച്ച ചലച്ചിത്രങ്ങളിൽ ഒന്നായിരുന്നു . അക്കാലം വരെയും ഹിന്ദി ചലച്ചിത്രലോകം കാണാത്ത വൻ റിലീസായിരുന്നു ചിത്രത്തിന് ലഭിച്ചത് . അതുപോലെ തന്നെ വളരെക്കാലം നിറഞ്ഞ സദസ്സിൽ പ്രദർശന വിജയം നേടിയ ചിത്രം കൂടിയാണ് മുഗൾ – ഇ – ആസാം. ദേശീയ പുരസ്കാരമടക്കം നിരവധി അവാർഡുകൾ കരസ്ഥമാക്കിയ ചിത്രം കൂടിയായിരുന്നു അത് .
ആദ്യമായി ഒരു ബ്ലാക്ക് ആൻഡ് വൈറ്റ് ചിത്രം , കളർ ചലച്ചിത്രമായി പ്രദർശനത്തിനെത്തിയതും മുഗൾ – ഇ – ആസാം ആണ് . 2004 നവംബറിൽ കളർ ചിത്രമായി പുറത്തിറങ്ങിയപ്പോഴും വൻവിജയമാണ് ചിത്രം കരസ്ഥമാക്കിയത് . ഇരുപത് പാട്ടുകളോളം ഈ ചലച്ചിത്രത്തിന് വേണ്ടി ചിത്രീകരിച്ചിരുന്നു എന്നാൽ ചലച്ചിത്രത്തിന്റെ പ്രദർശന സമയം നീണ്ടു പോയത് കൊണ്ട് പലതും മുറിച്ചു മാറ്റപ്പെട്ടു . ഹിന്ദുസ്ഥാനി ക്ലാസിക്കൽ സംഗീതജ്ഞനായ ഉസ്താദ് ഗുലാം അലി ഖാൻ ഈ ചലച്ചിത്രത്തിന് വേണ്ടി രണ്ടു പാട്ടുകൾ ആലപിച്ചിട്ടുണ്ട് .
കെ ആസിഫ് എന്ന സംവിധായകന്റെ ആകെയുള്ള രണ്ടു ചലച്ചിത്രങ്ങളിൽ ഒന്നാണ് മുഗൾ – ഇ – ആസാം . ചലച്ചിത്രം ഇറങ്ങി അറുപതു വർഷം തികയുമ്പോൾ , ഈ ചിത്രത്തിന്റെ ഹിന്ദി , റോമൻ , ഇംഗ്ലീഷ് എന്നീ മൂന്ന് ഭാഷകളിൽ ഉള്ള തിരക്കഥകൾ , കാലിഫോർണിയയിൽ ഉള്ള മാർഗരറ്റ് ഹെറിക്ക് ലൈബ്രറിയിൽ ലഭ്യമാക്കിയിരിക്കുന്നു . മാർഗരറ്റ് ഹെറിക്ക് ലൈബ്രറി , ചലനാത്മക ചിത്രങ്ങളുടെ ചരിത്രവും , അവയുടെ നിർമ്മാണവും , വ്യവ്യസായ തലത്തിൽ അവയുടെ മൂല്യവും അടങ്ങുന്ന വിവരങ്ങൾ സൂക്ഷിക്കുന്ന ലോകത്തെ പ്രശസ്തമായ ലൈബ്രറികളിൽ ഒന്നാണ് .
ഇംഗ്ലണ്ടിൽ താമസമാക്കിയ ആസിഫിന്റെ പുത്രൻ അക്ബർ ആസിഫ് , മുഗൾ – ഇ – ആസാമിന്റെ അറുപതാം വർഷം ആഘോഷിക്കുന്നത് , ചിത്രത്തിന്റെ തിരക്കഥ ഹോളിവുഡിലെ ഓസ്കർ ലൈബ്രറിയിൽ അവതരിപ്പിച്ചു കൊണ്ടാണ് . എക്കാലത്തെയും മികച്ച കലാകാരൻമാർ കൈകോർത്ത സിനിമയുടെ തിരക്കഥ എന്നും സൂക്ഷിക്കപ്പെടണം എന്ന ഉദ്ദേശ്യത്തോടു കൂടിയാണ് ഈ ലൈബ്രറികളിൽ അക്ബർ ആസിഫ് തിരക്കഥകൾ അവതരിപ്പിച്ചതും അവതരിപ്പിച്ചു കൊണ്ടിരിക്കുന്നതും .
