ഒരു കാർ വാങ്ങുമ്പോൾ ഏത് മോഡൽ എടുക്കും എന്ന സംശയത്തിൽ എല്ലാവരും എത്താറുണ്ട്. ഒരുപാട് കമ്പനികളും അവരുടെ തന്നെ ഒട്ടനവധി മോഡലുകളും കാണുമ്പോൾ ഈ സംശയം ഉണ്ടാകുന്നത് സർവസാധാരണ വിഷയം തന്നെ. സംശയനിവാരണത്തിനായി ഇന്റർനെറ്റ് പരിശോധിച്ചാലോ അല്ലെങ്കിൽ അടുത്ത സുഹൃത്തുക്കളുമായി സംസാരിച്ചാലോ തീരുമാനത്തിൽ എത്താനുള്ള സാധ്യതയും കുറവാണ്. അതിനാൽ പുതിയ കാർ വാങ്ങുമ്പോൾ ഇനി പറയുന്ന കാര്യങ്ങൾ ശ്രദ്ധിച്ച് സ്വയം തീരുമാനത്തിലെത്താൻ ശ്രമിക്കൂ.
1. ആദ്യം നിങ്ങളുടെ ആവശ്യങ്ങൾ ക്രമീകരിക്കുക. നിങ്ങളുടെ ആവശ്യത്തിനനുസരിച്ചുള്ള കാർ ആണ് തെരഞ്ഞെടുക്കേണ്ടത്. കാറിൽ എന്തെല്ലാം സൗകര്യങ്ങൾ വേണം, ഏത് തരത്തിലുള്ള കാർ ആണ് ആവശ്യം എന്നിങ്ങനെയുള്ള കാര്യങ്ങൾ ചിന്തിക്കാനുള്ള സന്ദർഭം ആണിത്.
2. ബജറ്റ് നിർണയിക്കുക. നിങ്ങളുടെ കയ്യിലുള്ള പണത്തിന് അനുസരിച്ചുള്ള കാർ തെരഞ്ഞെടുക്കുക. അല്ലാത്തപക്ഷം കയ്യിലെ കാശുമുടക്കിയും അല്ലെങ്കിൽ ലോൺ എടുത്തും ആഡംബര കാർ വാങ്ങുകയും പിന്നീട് മെയിന്റനൻസ് വേണ്ടി നെട്ടോട്ടം ഓടുകയും ചെയ്യും. അതിനാൽ കയ്യിലുള്ള പണത്തിന് അനുസൃതമായ കാർ തിരഞ്ഞെടുക്കുക.
3. പഴയ കാർ വിറ്റതിന് ശേഷം പുതിയത് വാങ്ങാൻ ആണ് തീരുമാനം എങ്കിൽ OBV (ഓറഞ്ച് ബുക്ക് വാല്യു) എന്ന വെബ്സൈറ്റ് നോക്കുന്നത് നല്ലതാണ്. ഇത്തരത്തിലുള്ള ക്രയവിക്രയങ്ങൾക്ക് നിങ്ങളെ സഹായിക്കാൻ ഇവർക്കാവും.
4. ബജറ്റ് തീരുമാനമായാൽ ഡീലർഷിപ്പിനെ സമീപിക്കുക. ഇന്റർനെറ്റിലെയും നേരിട്ട് ചെന്നറിയുമ്പോൾ അറിയുന്ന വിലയും തമ്മിൽ വ്യത്യാസം ഉണ്ടാവാൻ സാധ്യതയുണ്ട്. അതിനാൽ കമ്പനി ഡീലർഷിപ്പിനെ സമീപിക്കുകയും കാറിന്റെ വില, മൈലേജ്, ഓഡിയോ സിസ്റ്റം എന്നിവയെ കുറിച്ചുള്ള കാര്യങ്ങൾ ചോദിച്ച് മനസിലാക്കുക.
5. കാറിനെ കൂടുതൽ മനസിലാക്കാനായി ടെസ്റ്റ് ഡ്രൈവ് നടത്തുക. വാഹനത്തിന്റെ കാര്യക്ഷമത അറിയാൻ വേണ്ടിയാണ് ടെസ്റ്റ് ഡ്രൈവ് നടത്തുന്നത്.
6. ഓൺലൈൻ റിവ്യൂ വായിക്കാൻ മറക്കരുത്.
7. നിങ്ങൾ വാങ്ങാൻ ഉദ്ദേശിക്കുന്ന വാഹനങ്ങൾ ഉപയോഗിക്കുന്ന പലരുടെയും അഭിപ്രായം തേടുക. അവരുടെ അഭിപ്രായങ്ങൾ ലഭിച്ചതിന് ശേഷം സ്വയം ഒരു തീരുമാനത്തിൽ എത്തുക.
8. കാർ വാങ്ങാൻ ഉറപ്പിച്ചുകഴിഞ്ഞാൽ ഡീലർഷിപ്പിൽ നിന്നും എസ്റ്റിമേറ്റ് വാങ്ങുക. ഷോറൂം വിലയെ കൂടാതെ ഒരു കാർ വാങ്ങാനുള്ള ആകെ ചിലവ് ഇതിൽ നിന്നും നിങ്ങൾക്ക് മനസിലാകും.
9. ശേഷം ഓഫറോ ഡിസ്കൗണ്ടോ ഉണ്ടോ എന്ന് ചോദിച്ച് മനസിലാക്കുക.
10. ഓൺ റോഡ് വിലയും ഓഫറുകളും ഡിസ്കൗണ്ടുകളും മനസിലാക്കി കഴിഞ്ഞാൽ ഇതാണ് കാർ വാങ്ങാനുള്ള ശരിയായ സമയം.
Comments