ന്യൂഡല്ഹി: മുന് ഇന്ത്യന് നായകന് മഹേന്ദ്ര സിംഗ് ധോണിയുടെ വിരമിക്കല് പ്രഖ്യാപനമാണ് ഇന്ന് ഏറ്റവും കൂടുതല് ചര്ച്ചയാകുന്നത്. നീണ്ട 16 വര്ഷത്തെ കരിയറിനാണ് ധോണി കഴിഞ്ഞ ദിവസം വിരാമമിട്ടത്. വിരമിക്കാന് ധോണി തെരഞ്ഞെടുത്തത് ഇന്ത്യയുടെ സ്വാതന്ത്ര്യദിനമാണെന്നതാണ് മറ്റൊരു സവിശേഷത.
‘അദ്ദേഹം തന്റെ കരിയര് മുഴുവനായും ഇന്ത്യയ്ക്ക് വേണ്ടി സമര്പ്പിച്ചിരുന്നു. അകമഴിഞ്ഞ രാജ്യസ്നേഹിയായതിനാല് അന്താരാഷ്ട്ര ക്രിക്കറ്റിനോട് വിടപറയാന് ഇതിലും മികച്ച ദിവസം അദ്ദേഹത്തിനുണ്ടായിരുന്നില്ല. വിരമിക്കലുമായി ബന്ധപ്പെട്ട ചര്ച്ചകള് നടന്നിരുന്നു. എന്നാല് പ്രഖ്യാപനം എന്ന് വേണമെന്ന കാര്യത്തില് തീരുമാനം എടുത്തിരുന്നില്ല. ഇപ്പോള് അദ്ദേഹത്തിന്റെ ശ്രദ്ധ ഐപിഎല്ലിലാണ്’. ധോണിയുടെ മാനേജരായ മിഹിര് ദിവാകര് പറഞ്ഞു.
ഓഗസ്റ്റ് 15ന് രാത്രിയിലാണ് ധോണി ഇന്സ്റ്റഗ്രാമിലൂടെ വിരമിക്കല് പ്രഖ്യാപിച്ചത്. രാത്രി 7.29 മുതല് താന് വിരമിച്ചതായി കണക്കാക്കുക എന്നായിരുന്നു ധോണിയുടെ വാക്കുകള്. നീണ്ട കരിയറിലെ മനോഹരമായതും കയ്പേറിയതുമായ നിമിഷങ്ങള് കോര്ത്തിണക്കിയ 4 മിനിട്ടും 7 സെക്കന്ഡും ദൈര്ഘ്യമുള്ള വീഡിയോയും ധോണി പങ്കുവെച്ചിരുന്നു.
