2020 ഓട്ടോ എക്സ്പോയിലാണ് ഫോഴ്സ് ഗൂർഖ എസ് യു വിന്റെ പുതിയ പതിപ്പിനെ നിർമ്മാതാക്കൾ അവതരിപ്പിക്കുന്നത്. വാഹനത്തിന്റെ പരീക്ഷണയോട്ടത്തിന്റെ ചിത്രങ്ങൾ പുറത്തുവന്നുകൊണ്ടിരിക്കുകയാണ്. വാഹനത്തിന്റെ മുഖ്യ എതിരാളി ഥാർ കഴിഞ്ഞ ദിവസം വിപണിയിൽ എത്തിയിരുന്നു.
ഫോഴ്സ് ഗൂർഖ എസ് യു വി മൂടിക്കെട്ടലുകൾ ഇല്ലാതെ തന്നെയായിരുന്നു പരീക്ഷണയോട്ടം നടത്തിയത്. ചിത്രത്തിൽ കാണുന്നത് പോലെ നിലവിലെ മോഡലിനേക്കാൾ വിശാലമായ ഒന്നാണ് ഇനി അരങ്ങേറ്റം കുറിക്കാൻ പോകുന്നത്. സ്കിഡ് പ്ലേറ്റ്, രണ്ട് സ്ലേറ്റ് ഗ്രിൽ എന്നിവ പോലെയുള്ള പുതിയ മാറ്റങ്ങളും പുതിയ ഡിസൈനിൽ കാണാൻ സാധിക്കും. സാധാരണ മോഡലിൽ കാണുന്നതിൽ നിന്ന് വ്യത്യസ്തമായി ടെയിൽ ലാമ്പുകൾ ബമ്പറിൽ നിന്ന് ബോഡിയിലേക്ക് മാറ്റിയിരിക്കുന്നു.
മുകളിലായി സ്റ്റോപ്പ് ലാമ്പും കാണാൻ സാധിക്കും, എന്നാൽ എക്സ്പോയിൽ അവതരിപ്പിച്ച മോഡലിൽ ഇതുണ്ടായിരുന്നില്ല. പുതിയ മോഡലിൽ ലാഡർ ഫ്രെയിം ചാസിയും കോയിൽ സ്പ്രിഗുകൾ കൂടിയുണ്ട്. കൂടാതെ വലിയ വീൽ ആർച്ചുകളും ക്ലാഡിങ്ങുകളും പുതിയ പതിപ്പിനെ കൂടുതൽ മനോഹരമാക്കും. പുതിയ ഗ്രിൽ, പുനർരൂപകൽപ്പന ചെയ്ത ഹെഡ് ലാമ്പ് ക്ലസ്റ്ററുകൾ, 16 ഇഞ്ച് അലോയി വീലുകൾ എന്നിവയാണ് പുതിയ സവിശേഷതകൾ.
പുറം മോടി കൂടാതെ അകത്തളവും മനോഹരമായിട്ടുണ്ട് പുതിയ മോഡലിൽ. ഡ്യുവൽ ടോൺ തീം, പവർ വിൻഡോകൾ, ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, അനലോഗ് ഇൻസ്ട്രുമെന്റ് ക്ലസ്റ്റർ, ത്രീ സ്പോക്ക് സ്റ്റിയറിങ് വീൽ, വൃത്താകൃതിയിൽ ഉള്ള എയർ വെന്റുകൾ എന്നിവയും ഇതിൽ ഉൾപ്പെടുമെന്ന് പ്രതീക്ഷിക്കുന്നു.
ഫോഴ്സ് ഗൂർഖയ്ക്ക് കരുത്തേകാൻ ബിഎസ് VI നിലവാരത്തിലുള്ള 2.6 ലിറ്റർ ഡീസൽ എഞ്ചിൻ ആണുള്ളത്. 90 bhp കരുത്തും 200Nm ടോർക്കും സൃഷ്ടിക്കാൻ ഇതിനാകും. ഗിയർ ബോക്സിന് അഞ്ച് സ്പീഡ് മാനുവൽ ആണുള്ളത്.
വില സംബന്ധിച്ചുള്ള വിവരങ്ങൾ ഇത് വരെയും ലഭ്യമായിട്ടില്ല.
