ഡ്യൂസല്‍ഡോര്‍ഫ്: യൂറോപ്പാ ലീഗില്‍ ഇന്റര്‍ മിലാന്‍ ഫൈനലില്‍ കടന്നു. ഷാക്തര്‍ ഡോണ്‍സ്റ്റീകിനെ എതിരില്ലാത്ത അഞ്ചു ഗോളുകള്‍ക്കാണ് ഇറ്റാലിയന്‍ ലീഗിലെ വമ്പന്മാര്‍ തകര്‍ത്തത്. ലോററ്റോ മാര്‍ട്ടിനസും ലൊമേലൂ ലൂക്കാകുവും നേരിടയ ഇരട്ട ഗോളുകളുടെ മികവിലാണ് മിലാന്‍ കളം നിറഞ്ഞത്.
കളിയുടെ 19-ാം മിനിറ്റില്‍ തന്നെ മാര്‍ട്ടിനസിന്റെ ആദ്യ ഗോളില്‍ ഇന്റര്‍മിലാന് മുന്നിലെത്തി. തുടര്‍ന്ന് പ്രതിരോധം ശക്തമാക്കി ഷാക്തര്‍ പോരാടി. എന്നാല്‍ രണ്ടാം പകുതിയില്‍ കളി മാറി. 64-ാം മിനിറ്റില്‍ ഡാനിലോ അംബ്രോസിയോയുടെ വകയായിരുന്നു രണ്ടാം ഗോള്‍. 10 മിനിറ്റിനകം ഗോള്‍മഴ തീര്‍ത്ത് ഇന്റര്‍ താരങ്ങള്‍ ഷാക്തറിനെ തകര്‍ത്തു. 74-ാം മിനിറ്റില്‍ മാര്‍ട്ടിനസ് തന്റെ രണ്ടാം ഗോള്‍ നേടി. പുറകേ 78-ാം മിനിറ്റിലും 83-ാം മിനിറ്റിലും ലൂക്കാകൂ ഷാക്തറിന്റെ വല രണ്ടു വട്ടം ചലിപ്പിച്ച് ഗോള്‍ പട്ടിക 5-0 ആക്കി.
21-ാം തീയതി കൊളോണില്‍ നടക്കുന്ന കലാശപ്പോരാട്ടത്തില്‍ മാഞ്ചസ്റ്റര്‍ യുണൈറ്റഡിനെ 2-1ന് തോല്‍പ്പിച്ച സെവിയാണ് ഇന്ററിന്റെ എതിരാളി.
