മലയാളത്തിൽ വൻ വിജയമായിരുന്ന അയ്യപ്പനും കോശിയും തെലുങ്കിലേക്ക് റീമേക്ക് ചെയ്യുന്നു . തെലുങ്കിലെ മികച്ച നടന്മാരിൽ ഒരാളായ പവൻ കല്യാൺ ആയിരിക്കും ചിത്രത്തിലെ കേന്ദ്രകഥാപാത്രങ്ങളിൽ ഒരാളായി രംഗത്തെത്തുക . പവൻ കല്യാണിന്റെ പിറന്നാൾ ദിവസമായ സെപ്റ്റംബർ രണ്ടാം തീയതി ഔദ്യോഗിക അറിയിപ്പ് ഉണ്ടാവും എന്നാണ് തെലുങ്കിലെ വാർത്ത വൃത്തങ്ങൾ സൂചിപ്പിക്കുന്നത് .
തോൽ പ്രേമ, രംഗ് ദേ തുടങ്ങിയ ചിത്രങ്ങളിലൂടെ പ്രശസ്തനായ വെങ്കി അറ്റ്ലൂരി ആയിരിക്കും സിനിമ സംവിധാനം ചെയ്യുക . ഹാരിക ഹസിൻ നിർമ്മാണം ചെയ്യുന്ന ചിത്രം ചലച്ചിത്ര നിർമ്മാതാവ് ത്രിവിക്രം വിതരണത്തിനെത്തിക്കും.
ഒരു കേന്ദ്ര കഥാപാത്രത്തെ പവൻ അവതരിപ്പിക്കുമ്പോൾ മറ്റൊരു കേന്ദ്രകഥാപാത്രത്തെ അവതരിപ്പിക്കാൻ അണിയറയിൽ വിജയ് സേതുപതിയുമായി ചർച്ചകൾ നടക്കുന്നു എന്നാണ് സൂചന .
അയ്യപ്പനും കോശിയും സിനിമയുടെ ഒഫീഷ്യൽ ഇൻസ്റ്റാഗ്രാം അക്കൗണ്ടിലൂടെ നിർമ്മാതാവായ സൂര്യദേവര നാഗ വംശിയാണ് , വിവരം പോസ്റ്റ് ചെയ്തത് . കഴിഞ്ഞ മാർച്ചിൽ തെലുങ്കിലേക്ക് റീമേക്ക് ചെയ്യാനുള്ള പകർപ്പവകാശം അദ്ദേഹം വാങ്ങിയിരുന്നു .
സച്ചി സംവിധാനം ചെയ്ത ഈ ചിത്രം അതിന്റെ തലക്കെട്ട് സൂചിപ്പിക്കുന്ന രണ്ടു കഥാപാത്രങ്ങളായ അയ്യപ്പൻ നായർ, കോഷി കുര്യൻ എന്നിവരുടെ ജീവിത കഥ പറയുന്നു . ചിത്രത്തിൽ മികച്ച റെക്കോർഡുകൾക്ക് ഉടമയായ അയ്യപ്പൻ നായർ എന്ന പോലീസുകാരനായി ബിജു മേനോനും , പതിനാറ് വർഷത്തെ സേവനത്തിനു ശേഷം പട്ടാളത്തിൽ നിന്ന് ഹവിൽദാരായി വിരമിച്ച കോശി കുര്യനായി പൃഥ്വിരാജുമാണ് വേഷമിട്ടിരുന്നത് .
നടന്മാരായ നന്ദമുരി ബാലകൃഷ്ണയും, റാണ ദഗ്ഗുബാട്ടിയും തെലുങ്ക് റീമേക്കിൽ അഭിനയിക്കുമെന്ന് സൂചനകൾ ഉണ്ടായിരുന്നു . എന്നാൽ തെലുങ്ക് റീമേക്കിൽ ആരൊക്കെയാവും അണിനിരക്കുക എന്നറിയാൻ , അണിയറ പ്രവർത്തകർ സെപ്റ്റംബറിൽ പുറത്തിറക്കുന്ന പ്രഖ്യാപനത്തിനായി കാത്തിരിക്കേണ്ടി വരും .
ബോക്സ് ഓഫീസ് വിജയമായിരുന്ന ചിത്രത്തിൽ കോശിയുടെ അപ്പനായി വേഷമിട്ടത് സംവിധായകൻ രഞ്ജിത് ആയിരുന്നു . സ്ത്രീ കേന്ദ്രകഥാപാത്രങ്ങളെ അവതരിപ്പിച്ചത് ഗൗരി നന്ദയും അന്ന രേഷ്മ രാജനും ആയിരുന്നു .
Comments