ബാഴ്സലോണ: ചാമ്പ്യന്സ് ലീഗിലെ തോല്വിക്ക് ശേഷം വലിയ മാറ്റങ്ങളാണ് ബാഴ്സലോണയില് നടക്കുന്നത്. ക്വീകെ സെറ്റിയനെ പരിശീലക സ്ഥാനത്ത് നിന്നും മാറ്റിയതിനു പിന്നാലെ മുന് ബാഴ്സ താരവും നിലവില് നെതര്ലന്ഡ്സ് പരിശീലകനുമായ റൊണാള്ഡ് കോമാനെ ടീമിന്റെ മുഖ്യ പരിശീലകനായി നിയമിച്ചു. കഴിഞ്ഞ ദിവസം തന്നെ ഇതുസംബന്ധിച്ച റിപ്പോര്ട്ടുകള് വന്നിരുന്നെങ്കിലും ഇന്നാണ് ക്ലബ്ബിന്റെ ഭാഗത്തുനിന്നും ഔദ്യോഗിക സ്ഥിരീകരണം ലഭിച്ചത്.
ബാഴ്സയെ പരിശീലിപ്പിക്കാനുള്ള ചുമതല ഏറ്റെടുക്കാന് കോമാന് സമ്മതിച്ചതായും നെതര്ലന്ഡ്സിന്റെ പരിശീലക സ്ഥാനത്തുനിന്ന് കാലാവധി തികയും മുന്പ് ഒഴിയേണ്ടിവരുമ്പോള് നല്കേണ്ട നഷ്ടപരിഹാരത്തുക സ്പാനിഷ് ക്ലബ്ബ് നല്കുമെന്നും പ്രമുഖ സ്പോര്ട്സ് മാദ്ധ്യമങ്ങള് റിപ്പോര്ട്ട് ചെയ്തിരുന്നു. ടീമിനെ വലിയ തോതില് ഉടച്ചുവാര്ക്കുമെന്നും അതിലേക്കുള്ള ആദ്യ ചുവടായാണ് പരിശീലകനെ മാറ്റുന്നതെന്നും കഴിഞ്ഞ ദിവസം പുറത്തിറക്കിയ പത്രക്കുറിപ്പില് ബാഴ്സലോണ വ്യക്തമാക്കിയിട്ടുണ്ട്. നിലവില് മൂന്ന് വര്ഷത്തേക്കാണ് കോമാനുമായി ബാഴ്സ കരാര് ഒപ്പിട്ടിരിക്കുന്നത്.
1989 മുതല് 1995 വരെ കളിക്കാരനായും 1998-99 കാലയളവില് സഹ പരിശീലകനായും ബാഴ്സലോണക്കൊപ്പമുണ്ടായിരുന്ന കോമാന് തങ്ങളുടെ ടീമിന്റെ ഫുട്ബോള് ശൈലിക്ക് ചേര്ന്ന പരിശീലകനാണെന്നാണ് ബാഴ്സ മാനേജ്മെന്റിന്റെ വിലയിരുത്തല്. ആറു വര്ഷം ബാഴ്സക്കു വേണ്ടി ബൂട്ടുകെട്ടിയ അദ്ദേഹം 67 ഗോളടിച്ചു. പ്രതിരോധത്തിലും മിഡ് ഫീല്ഡിലുമായിരുന്നു ചുമതലയെങ്കിലും ആക്രമണത്തിലും കോമാന് ഒട്ടും മോശമായിരുന്നില്ല. ബാഴ്സ ഒരു യൂറോപ്യന് കിരീടം ആദ്യമായി നേടിയ 1992-ല് ഫൈനലിലെ നിര്ണായക ഗോള് നേടിയത് കോമാനായിരുന്നു.
