ഇന്ത്യയിൽ കാണപ്പെടുന്ന പട്ടുകൾ അവയുടെ ഘടന കൊണ്ടും സൗന്ദര്യം കൊണ്ടും മറ്റു തുണിത്തരങ്ങളെക്കാൾ വേറിട്ട് നിൽക്കുന്നു . പട്ടുവസ്ത്രങ്ങൾ ധരിക്കാൻ മോഹിക്കുന്നവരുടെ ആഗ്രഹങ്ങൾക്കനുസരിച്ചു വൈവിധ്യം നിറഞ്ഞ വസ്ത്രങ്ങൾ ഇന്ന് വിപണിയിൽ ലഭ്യമാണ് .
തിളക്കവും മിനുസമാർന്ന ഘടനയും ഉള്ള പട്ടുവസ്ത്രങ്ങൾ കാലാകാലങ്ങളായി ഇന്ത്യയിലെ ഉപഭോക്താക്കൾക്കിടയിൽ വൻപ്രചാരം ആണ് നേടിയിട്ടുള്ളത് .ചൈനക്ക് ശേഷം ഏറ്റവും കൂടുതൽ പട്ടുവസ്ത്രങ്ങൾ നിർമ്മിക്കുന്ന രാജ്യമാണ് ഇന്ത്യ .മൾബറി , ടസ്സർ , മുഖ , ഏറി എന്നീ നാലുതരത്തിലുള്ള പട്ടുകളാണ് ഇന്ത്യയിൽ ഉള്ളത് . വിപണിയിൽ എത്തുന്ന എൺപതു ശതമാനം പട്ടുവസ്ത്രങ്ങളും മൾബറി പട്ടു കൊണ്ടാണ് നിർമ്മിക്കുന്നത് .
മുഖ പട്ട്
അസമിൽ ഉല്പാദിപ്പിക്കുന്ന മുഖ പട്ട് ലോകത്തിൽ അപൂർവമായി മാത്രം കണ്ടു വരുന്ന ഒന്നാണ് . അസമിൽ പട്ടുനൂൽ പുഴുവിൽ നിന്ന് നിർമ്മിക്കുന്ന ഇവ അതിന്റെ തിളക്കത്തിനും ഈടിനുമാണ് പ്രസിദ്ധിയാർജ്ജിച്ചിരിക്കുന്നത് . ശക്തമായ നാരുകൾ കൊണ്ടുണ്ടാക്കുന്ന മുഖ പട്ടിന് മഞ്ഞകലർന്ന സ്വർണ്ണ നിറമാണുള്ളത് . പരമ്പരാഗത അസം വസ്ത്രമായ മെഖേല ചാഡോർ, കുർത്തകൾ , സാരികൾ എന്നിവ നിർമ്മിക്കാൻ മുഖ പട്ടുപയോഗിക്കുന്നു . പട്ടു തുണിത്തരങ്ങളിൽ വെച്ച് ഏറ്റവും വില കൂടിയ ഒന്ന് കൂടിയാണ് മുഖ പട്ട് .
ഏറി പട്ട്
പലതരത്തിലുള്ള പട്ടു തുണികൾ നിർമ്മിക്കുന്ന പ്രദേശമാണ് അസം . സമിയ റിക്കിനി, ഫിലോസാമിയ റിക്കിനി എന്ന പട്ടുനൂൽ പുഴുക്കളിൽ നിന്നാണ് ഏറി പട്ടുൽപാദിപ്പിക്കുന്നത് . പട്ടുനൂൽ പുഴുവിനെ കൊല്ലാതെ ഉല്പാദിപ്പിക്കുന്നതിനാൽ ഇവക്കു അഹിംസ പട്ടെന്നും പീസ് പട്ടെന്നും പേരുണ്ട് . അതിനാൽ തന്നെ ഇന്ത്യ , ജപ്പാൻ , നേപ്പാൾ , ചൈന തുടങ്ങിയ സ്ഥലങ്ങളിലെ ബുദ്ധ സന്യാസിമാർ ഏറി പട്ടുകൊണ്ട് നിർമ്മിക്കുന്ന വസ്ത്രങ്ങൾ ഉപയോഗിക്കുന്നത് .ഇടതൂർന്നതും പരുപരുത്തതുമായ പട്ട് താരതമ്യേന മറ്റുള്ളവയിൽ നിന്ന് വിലക്കുറവാണ് . ഷാളുകൾ , പുതപ്പുകൾ എന്നിവ നിർമ്മിക്കാൻ ആണ് കൂടുതലായും ഏറി പട്ടുകൾ ഉപയോഗിക്കുന്നത് .
ടസ്സർ പട്ട്
സംസ്കൃതത്തിൽ കോസ പട്ടെന്നും അറിയപ്പെടുന്ന ടസ്സർ പട്ട് വെസ്റ്റ് ബംഗാൾ , ഒഡിഷ , ബിഹാർ , ജാർഖണ്ഡ് , ഛത്തിസ്ഗർ , മധ്യപ്രദേശ് , മഹാരാഷ്ട്ര തുടങ്ങിയ സ്ഥലങ്ങളിൽ ആണ് ഉല്പാദിപ്പിക്കുന്നത് . കാടുകളിൽ കാണുന്ന പ്രത്യേക ഇനം പട്ടുനൂൽ പുഴുക്കളിൽ നിന്നാണ് ടസ്സർ പട്ടുണ്ടാക്കുന്നത് . ഈ പട്ടുൽപാദന രംഗത്ത് ഇന്ത്യ രണ്ടാം സ്ഥാനത്താണുള്ളത് .സാരികളാണ് ടസ്സർ പട്ടുപയോഗിച്ചു ഏറ്റവും കൂടുതൽ നിർമ്മിക്കുന്നത് . ഭഗൽപുരി പട്ടും കോസ പട്ടും , ടസ്സർ പട്ടിന്റെ രണ്ടു വ്യത്യസ്ത ഇനങ്ങളാണ് . ഭഗൽപുരി പട്ട് നിർമ്മിക്കുന്നത് ബിഹാറിൽ ആണ് . പലതരത്തിലുള്ള വർണ്ണ പട്ടുനൂൽ കൊണ്ട് നിർമ്മിക്കുന്ന ഭഗൽപുരി സാരികൾ കാണാൻ അതിമനോഹരമാണ് . ഛത്തിസ്ഗഡിനു സ്വന്തമാണ് കോസ പട്ട് . മങ്ങിയ സ്വർണ്ണ നിറമാണ് കോസ പട്ടിന്റെ സവിശേഷത .
മൾബറി പട്ട്
ഇന്ത്യയിൽ ഏറ്റവും കൂടുതൽ പ്രചാരം ഉള്ളതും അറിയപ്പെടുന്നതും മൾബറി പട്ടാണ് . തമിഴ്നാട് , കർണാടക , ആന്ധ്ര പ്രദേശ്, ജമ്മു കാശ്മീർ തുടങ്ങിയ സ്ഥലങ്ങൾ ആണ് മൾബറി പട്ട് കൂടുതലായി ഉല്പാദിപ്പിക്കുന്നത് . ബലമുള്ള പട്ടുനൂല് കൊണ്ട് നിർമ്മിക്കുന്നതിനാൽ ഏറെകാലം ഉപയോഗിക്കാം എന്നുള്ളതാണ് മൾബറി പട്ടു കൊണ്ട് നിർമ്മിക്കുന്ന വസ്ത്രങ്ങൾക്ക് പ്രചാരം നൽകിയത് .ബനാറസി പട്ട് , കാഞ്ചീപുരം പട്ട് , ചന്ദേരി പട്ട് , മൈസൂർ പട്ട് , പോച്ചംപള്ളി പട്ട് തുടങ്ങിയവ മൾബറി പട്ടിന്റെ വിവിധ ഇനങ്ങളാണ് .
