ഭാരതത്തിൽ ധാരാളമായി കണ്ടു വരുന്ന നിത്യഹരിത വൃക്ഷമാണ് അശോകമരം . മനോഹരമായ ഇലകളും സുഗന്ധപൂരിതമായ പുഷ്പങ്ങളും കൊണ്ട് മനോഹാരിയാകുന്ന വൃക്ഷം ആരുടേയും മനം കുളിർപ്പിക്കും , അതിനാലാവാം ശോകം അകറ്റുന്ന വൃക്ഷം അതായത് അശോകം എന്ന നാമം ഈ വൃക്ഷത്തിന് ലഭിച്ചത് . പക്ഷിമൃഗാദികളും മനുഷ്യരിലും പ്രേമം വിതക്കുന്ന കാമദേവൻ അശോകാവൃക്ഷത്തിൽ ഉണ്ടാവുന്ന പുഷ്പത്തിന്റെ സുഗന്ധവും ഭംഗിയും കൊണ്ടാവാം തന്റെ ശരത്തിലെ അഞ്ചു പുഷ്പങ്ങളിൽ ഒന്ന് അശോകപുഷ്പമാക്കിയത് . രാമായണത്തിൽ രാവണൻ തട്ടി കൊണ്ട് പോയ സീതാദേവി ലങ്കയിൽ വസിച്ചതും അശോകവനത്തിലാണ് .
ഫലഭൂയിഷ്ഠമായതും ഈർപ്പമുള്ളതുമായ പ്രദേശങ്ങളിൽ നന്നായി വളരുന്ന അശോകം , തണൽ മരമായും , അലങ്കാര വൃക്ഷമായും , ഔഷധ സസ്യമായും വളർത്തുന്നു . വിത്തുകൾ മുളപ്പിച്ചോ , കമ്പു വെട്ടി വെച്ചോ അശോക വൃക്ഷം വളർത്താവുന്നതാണ് . ഫെബ്രുവരി മുതൽ ഏപ്രിൽ മാസം വരെയാണ് അശോക വൃക്ഷം പൂത്തുലയുന്നത് .
ആയുർവേദ ചികിത്സകളിൽ ഒഴിച്ച് കൂടാനാവാത്ത ഒന്നായ അശോകത്തെക്കുറിച്ചു ചരക സംഹിതയിൽ വിശദമായി പ്രതിപാദിച്ചിട്ടുണ്ട് . അശോകത്തിന്റെ അപര നാമങ്ങളായ അംഗനപ്രിയ , ശുഭഗ , മധുപുഷ്പ തുടങ്ങിയവ വൃക്ഷത്തിന് സ്ത്രീകളിൽ ഉണ്ടാകുന്ന രോഗങ്ങൾ ചികിൽസിക്കാൻ വേണ്ടി ഉപയോഗിക്കുന്നതിന്റെ പ്രാധാന്യം വ്യക്തമാക്കുന്നു . സ്ത്രീകളുടെ പാദസ്പർശമേറ്റാൽ അശോകം പുഷ്പ്പിക്കും എന്നൊരു വിശ്വാസം കൂടിയുണ്ട് . പദ്മപുരാണത്തിലും മത്സ്യപുരാണത്തിലും ശോകമകറ്റി സന്തോഷം പ്രധാനം ചെയ്യുന്ന വൃക്ഷമായി അശോക വൃക്ഷത്തെ പരാമർശിക്കുന്നുണ്ട് .
സ്ത്രീകൾക്കുണ്ടാകുന്ന അത്യാർത്തവത്തിന് , അശോക വൃക്ഷത്തിന്റെ തൊലി പാലിൽ ചേർത്ത് സേവിക്കുന്നത് ഉത്തമമാണ് . ആർത്തവക്രമേടുകൾക്കും, വായിൽ ഉണ്ടാകുന്ന പുണ്ണിനും, പുളിച്ചു തികട്ടലിനും , ദഹനക്കേടിനും അശോകത്തിന്റെ തൊലി ചേർത്തുണ്ടാക്കിയ കഷായം സേവിക്കുന്നത് ഗുണം ചെയ്യും .
അശോകത്തിന്റെ തൊലി ചൂർണ്ണമാക്കി ദിനവും ചായയിലോ , കാപ്പിയിലോ , പാലിലോ ചേർത്ത് കഴിക്കുന്നത് ചർമ്മകാന്തി വർദ്ധിപ്പിക്കുന്നതിനു അനുയോജ്യമാണ് . ചർമ്മത്തിലെ നിറവ്യത്യാസത്തിനും , തൊലിപ്പുറത്തുണ്ടാകുന്ന വൃണങ്ങൾക്കും അശോകത്തിന്റെ തൊലി അരച്ച് പുരട്ടുന്നത് ഉത്തമമാണ് .
