ദേവാദി ദേവനായ മഹാദേവന്റെ തിരു മുന്‍പില്‍ ചെന്നു പ്രാര്‍ത്ഥിക്കുമ്പോള്‍ ചില ചിട്ടകള്‍ പാലിക്കേണ്ടതുണ്ട്. ഏറ്റവും കൂടുതല്‍ ചിട്ടകള്‍ ശ്രദ്ധിക്കേണ്ടതും ശിവക്ഷേത്ര ദര്‍ശനം നടത്തുമ്പോള്‍ തന്നെയാണ്. ശിവ ക്ഷേത്രത്തില്‍ ചെല്ലുമ്പോള്‍ ശിവഭഗവാന്റെ മുന്നിലായി നന്ദികേശന്റെ പ്രതിഷ്ഠ കാണാം. അതുകൊണ്ടു തന്നെ ക്ഷേത്രത്തിനകത്ത് പ്രവേശിച്ചാല്‍ ആദ്യം തൊഴേണ്ടത് നന്ദികേശനെ തന്നെയാണ്. വലതു വശത്തു നിന്നു വേണം നന്ദികേശനെ തൊഴാന്‍. അതിനു ശേഷം മാത്രമേ ശിവഭഗവാനെ തൊഴാന്‍ പാടുകയുള്ളൂ. ശ്രീകോവിലിന്റെ ഇടതു വശത്തു നിന്നു വണം ഭഗവാനെ പ്രാര്‍ത്ഥിക്കാന്‍. ശിവക്ഷേത്രത്തില്‍ ഒരിക്കലും പൂര്‍ണ്ണമായി പ്രദക്ഷിണം വയ്‌ക്കാന്‍ പാടുള്ളതല്ല.
ഒരു കാരണവശാലും ശിവക്ഷേത്രത്തിലെ ഓവ് മുറിച്ച് കടക്കാന്‍ പാടില്ല. നന്ദികേശനെ നാലു പ്രാവശ്യവും ഭഗവാനെ മൂന്നു പ്രാവശ്യം തൊഴുതാല്‍ മാത്രമേ ഒരു പ്രദക്ഷിണം പൂര്‍ത്തിയായി എന്ന് പറയാന്‍ സാധിക്കുകയുള്ളൂ. ഒന്‍പത് പ്രാവശ്യം ശിവക്ഷേത്രത്തില്‍ പ്രദക്ഷിണം പൂര്‍ത്തിയാക്കിയാല്‍ ഭഗവാന്റെ പ്രീതി ലഭിക്കും എന്നതാണ് വിശ്വാസം. നന്ദികേശനും ഭഗവാനും ഇടയില്‍ നിന്ന് അല്ലെങ്കില്‍ ശ്രീകോവിലിനു നേരെ നിന്നുകൊണ്ടും പ്രാര്‍ത്ഥിക്കാന്‍ പാടുള്ളതല്ല. ഇത് നന്തി കോപത്തിന് കാരണമാകുന്നു. ശിവഭഗവാന്റെ പിറകിലായാണ് പാര്‍വതി ദേവിയുടെ സ്ഥാനം എന്നതാണ് സങ്കല്‍പം. അതിനാലാണ് പിന്‍വിളക്ക് കഴിപ്പിക്കുന്നത്.
എന്നാല്‍ ജലധാരയാണ് ശിവ ക്ഷേത്രത്തിലെ പ്രധാന വഴിപാട്. ഭഗവാന് ഏറ്റവും ഇഷ്ടപ്പെട്ട വഴിപാടും ഇതു തന്നെയാണ്. കൂവള മാലയാണ് ശിവഭഗവാന് ഏറ്റവും പ്രിയപ്പെട്ടത്. ഇതിനു പുറമെ നന്ത്യാര്‍വട്ടം, ചെമ്പകം, താമര, വെള്ള എരിക്കിന്‍ പൂവ് എന്നിവയും ഭഗവാന്റെ ഇഷ്ട പുഷ്പങ്ങളില്‍പ്പെടുന്നു. പ്രാര്‍ത്ഥിച്ച് ഇറങ്ങുമ്പോള്‍ ക്ഷേത്രത്തിനുള്ളില്‍ കുറച്ചുനേരം ഓം നമ:ശിവായ എന്ന മന്ത്രം ഉരുവിട്ട് ഇരിക്കുന്നതിലൂടെ നമ്മുടെ മനസ്സിന് ശാന്തി ലഭിക്കുകയും ദുഃഖങ്ങള്‍ ഇല്ലാതാകുകയും ചെയ്യുന്നു എന്നാണ് വിശ്വാസം.
