പാലക്കാട് ജില്ലയിലെ അകത്തേത്തറ ഗ്രാമത്തിലാണ് കല്ലേകുളങ്ങര ഹേമാംബിക ക്ഷേത്രം സ്ഥിതി ചെയ്യുന്നത് . മൂന്നു സമയങ്ങളിലും ദേവിയുടെ മൂന്നു അവതാരങ്ങളെയാണ് ക്ഷേത്രത്തില് ആരാധിച്ചു പോരുന്നത്. രാവിലെ സരസ്വതിയായും മധ്യാഹ്നത്തില് മഹാലക്ഷ്മിയായും പ്രദോഷത്തില് ദുര്ഗ്ഗയായും ക്ഷേത്രത്തില് ദേവിയെ ആരാധിക്കുന്നു. കരിങ്കല്ലു കൊണ്ടുള്ള രണ്ടു ശിലാ ഹസ്തങ്ങളാണ് കല്ലേകുളങ്ങര ഹേമാംബിക ക്ഷേത്രത്തിലെ പ്രതിഷ്ഠ. കുറൂര് മനയിലെ ഒരംഗം സ്ഥിരമായി ദേവി ഉപാസിച്ചു പോന്നിരുന്നു. എന്നാല് വാര്ദ്ധക്യ സഹജമായ ബുദ്ധിമുട്ടുകള് അനുഭവപ്പെടാന് തുടങ്ങിയതോടെ അദ്ദേഹത്തിന് മുതിരം കുന്നിലുള്ള ദേവിയെ കാണാന് പോകാന് സാധിക്കാതെ വന്നു.
ഇതില് കുറൂര് നമ്പൂതിരി ഏറെ വിഷമിച്ചിരുന്നു. അങ്ങിനെയിരിക്കെ ഒരു ദിവസം കുറൂര് നമ്പൂതിരിയുടെ സ്വപ്നത്തില് ദേവി പ്രത്യക്ഷപ്പെടുകയും മനയോടു ചേര്ന്നുള്ള ചിറയില് തന്റെ സാന്നിധ്യമുണ്ടെന്ന് അറിയിക്കുകയും ചെയ്തു. പിറ്റേ ദിവസം രാവിലെ ചിറയുടെ നടുവില് നിന്നും രണ്ട് കൈകള് ഉയര്ന്നു വരുന്നത് അദ്ദേഹത്തിന്റെ ശ്രദ്ധയില്പ്പെട്ടു. അതു കണ്ട് സന്തോഷിച്ച കുറൂര് നമ്പൂതിരിപ്പാട് ചിറയിലേക്കു എടുത്തുചാടി ആ കൈകള് വലിച്ചു പിടിച്ചു.
അപ്പോള് ദേവിയുടെ കരങ്ങള് ശിരാപാണികളായി മാറി എന്നുമാണ് ഐതീഹ്യം. പിന്നീട് പാലക്കാട് രാജാവിന്റെ നിര്ദ്ദേശ പ്രകാരം ചേന്നാസ് നമ്പൂതിരിപ്പാടിന്റെ സഹായത്തോടെ ചിറ ഭാഗികമായി നികത്തിയാണ് ക്ഷേത്രം നിര്മ്മിച്ചത്. അതോടെ ദേവി ദേശത്തിന്റെ കുലദേവതയായി മാറി.
ശിവരാത്രി, നവരാത്രി, ഓണം, മണ്ഡലകാല പൂജ, മീനത്തിലെ ലക്ഷാര്ച്ചന, കര്ക്കിടകത്തിലെ ഈശ്വര സേവ എന്നിവയാണ് കല്ലേകുളങ്ങര ഹേമാംബിക ക്ഷേത്രത്തിലെ പ്രധാന വഴിപാടുകള്.
