കൊറോണക്കാലം നമ്മുടെ ജീവിതത്തെ തന്നെ മാറ്റിമറിച്ചു. മാസ്കും സാനിറ്റൈസറും ഇല്ലാതെ ഇനിയൊരു ജീവിതമുണ്ടോ എന്ന സംശയത്തിലാണ് എല്ലാവരും. വ്യത്യസ്ത മാസ്കുകൾ കൊണ്ട് ഓരോരുത്തരും വിസ്മയിപ്പിക്കുമ്പോൾ എയർ പ്യൂരിഫയർ മാസ്കുമായി രംഗത്ത് വന്നിരിക്കുകയാണ് എൽജി. പ്യൂരികെയർ വെയറബിൾ എയർ പ്യൂരിഫയർ എന്നാണ് പേര്.
വിപണിയിലെ മറ്റ് എയർ പ്യൂരിഫയറുകളെ പഠനവിധേയമാക്കിയാണ് എൽജി ഇത്തരമൊരു ഉല്പന്നത്തിലേക്ക് എത്തിയത്.
വീടുകളിൽ സാധാരണയായി ഉപയോഗിക്കുന്ന എൽജിയുടെ എയർ പ്യൂരിഫയർ ഉല്പന്നങ്ങളിൽ ഉള്ള ഫിൽറ്ററുകൾക്ക് സമാനമായ രീതിയിൽ മാറ്റിവയ്‌ക്കാവുന്ന ഒരു ജോഡി ഫിൽറ്റർ ആണ് എൽജിയുടെ പ്യൂരികെയറിൽ കാണാൻ സാധിക്കുക.
ബാറ്ററിയിൽ പ്രവർത്തിക്കുന്ന ഫാനുകളും ഇതിൽ കാണാൻ സാധിക്കും. ഒരാൾ ശ്വാസമെടുക്കുന്നതും പുറത്തുവിടുന്നതും മനസിലാക്കാൻ കഴിയുന്ന സെൻസറുകൾ മാസ്‌കിലുണ്ട്. ഇതിന്റെ പ്രവർത്തനഫലമായാണ് ഫാനിന്റെ വേഗത മാറുന്നത്. ഈ സെൻസറുകളുടെ പേറ്റന്റ് കമ്പനി നേടിക്കഴിഞ്ഞു. ശുചീകരിച്ച വായു ശ്വസിക്കാൻ ഇതിലെ ഫാനുകൾ സഹായിക്കും.
മുഖവുമായി അടുത്ത് ഇരിക്കുന്നതിനാൽ കവിൾ, മൂക്ക് എന്നീ ഭാഗങ്ങളിലൂടെ വായു മാസ്കിന്റെ ഉള്ളിലേക്കോ പുറത്തേക്കോ പോകുകയുമില്ല. ഫിൽറ്ററുകൾ എപ്പോൾ മാറ്റണം എന്ന സംശയവും വേണ്ട. എൽജി തിൻക്യു എന്ന മൊബൈൽ ആപ്പിലൂടെ എപ്പോൾ ഫിൽറ്റർ മാറ്റണം എന്ന സന്ദേശം ഉടമയ്‌ക്ക് ലഭിക്കും. ആപ്പ് ആൻഡ്രോയ്ഡ്, ഐഒഎസ് എന്നിവയിൽ ലഭ്യമാണ്. മാസ്കിലെ എല്ലാ ഭാഗവും ഊരിമാറ്റാനും റീസൈക്കിൾ ചെയ്യാനാവുന്നതുമാണ്.
820 mAh ബാറ്ററിയുള്ള ഈ മാസ്‌ക് ലോ പവർ മോഡിൽ 8 മണിക്കൂറും ഹൈ പവർ മോഡിൽ 2 മണിക്കൂറും പ്രവർത്തിക്കുന്നു. മാസ്കിലെ UV-LED ലൈറ്റുകൾക്ക് ദോഷകരമായ അണുക്കളെ നശിപ്പിക്കാൻ സാധിക്കും.
എൽജിയുടെ ഈ പുത്തൻ മാസ്‌ക് എന്നാണ് വിപണിയിൽ എത്തുക എന്നതിന് കൃത്യമായ ഉത്തരമില്ല.
