പുതുപുത്തൻ കാർ വിശേഷങ്ങൾ അറിയാനും നല്ലതാണേൽ ഒന്ന് വാങ്ങി നോക്കാനും ആഗ്രഹമില്ലാത്തവർ ഉണ്ടോ ? വാഹനപ്രേമികളുടെ മനം കവരാൻ DB5 ഇലക്ട്രിക് ജൂനിയർ മോഡൽ എത്തി. ബ്രിട്ടീഷ് സ്പോർട്സ് കാർ നിർമ്മാതാക്കളായ ആസ്റ്റൺ മാർട്ടിനും ദി ലിറ്റിൽ കാർ കമ്പനിയും സഹകരിച്ച് നിർമ്മിച്ച ഈ കാർ വിപണിയിൽ അവതരിപ്പിച്ചു കഴിഞ്ഞു.
ബുഗാട്ടി ബേബി കാർ പോലെയുള്ള മോഡലുകൾ വികസിപ്പിച്ച ലിറ്റിൽ കാർ കമ്പനിയുടെ കീഴിൽ നിർമിച്ച DB5 ഇലക്ട്രിക് ജൂനിയർ മോഡൽ തികച്ചും വ്യത്യസ്തമായ ഒന്നാണ്.
വെറും 15 മാസത്തെ അധ്വാനം ആണ് ഈ കാറിന് പിറകിൽ ഉള്ളത്. ഒരു ഒറിജിനൽ ആസ്റ്റൺ മാർട്ടിൻ DB5 സൂപ്പർ കാറിന്റെ 3D സ്കാൻ മോഡൽ അടിസ്ഥാനമാക്കിയാണ് ഈ കാർ നിർമ്മിച്ചിരിക്കുന്നത്.
മൂന്ന് മീറ്റർ നീളവും 1.1 മീറ്റർ വീതിയുമുള്ള ഈ കാറിൽ ഒരു മുതിർന്ന ആൾക്കും ഒരു കുഞ്ഞിനും ഇരിക്കാവുന്നതാണ്.
കാറിന്റെ ആകെ ഭാരം 270 കിലോഗ്രാമാണ്. ഓൾ ഇലക്ട്രിക് കാർ ആയ ഇതിന്റെ പരമാവധി വേഗത മണിക്കൂറിൽ 48കിലോമീറ്റർ ആണ്. കൂടാതെ എഞ്ചിന് 6.7bhp കരുത്ത് ഉൽപ്പാദിപ്പിക്കാൻ സാധിക്കും. അലുമിനിയം ഹണികോമ്പ് ചാസിയും കോമ്പോസിറ്റ് ബോഡിയും വളരെ ദൃഢമായ പ്ലാറ്റ്ഫോമിലാണ് ഒരുക്കിയിരിക്കുന്നത്. വാഹനത്തിൽ വെന്റിലേറ്റഡ് ഡിസ്ക് ബ്രേക്കുള്ള 10 ഇഞ്ച് വയർ വീലുകൾ ആണ് കാണാൻ സാധിക്കുക. 16-32 കിലോമീറ്റർ മൈലേജ് ആണ് പ്രതീക്ഷിക്കുന്നത്. ഒപ്പം തന്നെ 1960 കളിലെ ഒറിജിനൽ DB5 കാറിൽ ഉള്ളത് പോലെയുള്ള സ്മിത്ത്സ് ക്ളോക്ക് പാസഞ്ചർ സീറ്റിന് സമീപമായി കാണാം.
ബില്ലറ്റ് അലുമിനിയം ആക്സിലറേറ്ററും ബ്രേക്ക് പെഡലുകളും കൂടാതെ ഹെഡ്ലൈറ്റുകൾ, ബ്രേക്ക് ലൈറ്റുകൾ, ഇൻഡിക്കേറ്ററുകൾ, ഹോൺ എന്നിവയും ഈ കുഞ്ഞുകാറിൽ ഒരുക്കിയിരിക്കുന്നു.
Comments