ന്യൂഡല്ഹി: അന്തരിച്ച മുന് രാഷ്ട്രപതി പ്രണബ് മുഖര്ജിയെ ആദരിച്ച് ബംഗ്ലാദേശ് സര്ക്കാര്. ബംഗ്ലാദേശ് ഇന്ന് ഒരു ദിവസത്തെ ദേശീയ ദു:ഖാചരണം പ്രഖ്യാപിച്ചിരിക്കുകയാണ്. ഇന്ത്യയിലെ ബംഗ്ലാദേശ് നയതന്ത്ര കാര്യാലയത്തില് നടന്ന ചടങ്ങിലാണ് ബംഗ്ലാദേശ് സ്ഥാനപതി പ്രണബ് മുഖര്ജിയ്ക്ക് ആദരാഞ്ജലിയര്പ്പിച്ചത്. നയതന്ത്ര കാര്യാലയത്തിലെ ബംഗ്ലാദേശ് പതാക പകുതി താഴ്ത്തിയാണ് ഔദ്യോഗിക ദു:ഖാചരണം .
‘ മുന് ഇന്ത്യന് രാഷ്ട്രപതി പ്രണബ് മുഖര്ജി ബംഗ്ലാദേശിന്റെ ഉറ്റ സുഹൃത്തായിരുന്നു. അതിനാല് തന്നെ ആ മഹാനായ രാഷ്ട്രതന്ത്രജ്ഞന് ബംഗ്ലാദേശ് ഉചിതമായ ആജരാഞ്ജലികളര്പ്പിക്കുന്നു. ബംഗ്ലാദേശ് ഇന്ന് ദേശീയ ദു:ഖാചരണവും നടത്തുകയാണ്. ഞങ്ങള് അദ്ദേഹത്തിന്റെ ഓര്മ്മകള്ക്ക് മുന്നില് ശിരസ്സുകുനിക്കുന്നു. അദ്ദേഹത്തിന്റെ ആത്മാവിന് നിത്യശാന്തി ലഭിക്കട്ടെ’ ബംഗ്ലാദേശ് ഹൈക്കമ്മീഷണര് മുഹമ്മദ് ഇമ്രാന് സന്ദേശത്തില് പറഞ്ഞു.
കഴിഞ്ഞ ദിവസം ബംഗ്ലാദേശ് പ്രധാനമന്ത്രി ഷേഖ് ഹസീന പ്രണബ് മുഖര്ജിയോടുള്ള ആദരം പ്രധാനമന്ത്രി നരേന്ദ്രമോദിയ്ക്ക് അയച്ച സന്ദേശത്തിലൂടെ അറിയിച്ചിരുന്നു. 2013ല് ബംഗ്ലാദേശിന്റെ പരമോന്നത ബഹുമതി പ്രണബിന് സമ്മാനിച്ചിരുന്നു. ‘ബംഗ്ലാദേശ് മുക്തിജുതോ സൊമ്മാനോന’ എന്ന ബഹുമതി 1971ലെ ബംഗ്ലാദേശ് യുദ്ധത്തില് പ്രണബ് മുഖര്ജിയുടെ സമാധാന ശ്രമങ്ങളെ പ്രകീര്ത്തിച്ചുകൊണ്ടാണ് സമ്മാനിച്ചത്.
Comments