സംഗീതത്തെ ജീവിതമായി കണ്ട സലിൽ ചൗധരി , വെസ്റ്റ് ബംഗാളിൽ ജനിച്ച സലിൽ ചൗധരി തന്റെ കുട്ടികാലം ചിലവിട്ടിരുന്നത് ആസ്സാമിലെ തേയില തോട്ടങ്ങളിലായിരുന്നു . നാടക കലയിൽ നിറഞ്ഞു നിന്നിരുന്ന അദ്ദേഹത്തിന്റെ അച്ഛന്റെ വെസ്റ്റേൺ ക്ലാസിക്കൽ ശേഖരം കേൾക്കുക എന്നത് സലിൽ ദായുടെ ഒരു ശീലം തന്നെയായിരുന്നു . ആറാമത്തെ വയസ്സിൽ തന്റെ ജ്യേഷ്ഠ സഹോദരനിൽ നിന്ന് പിയാനോ വായിക്കാൻ പഠിച്ച അദ്ദേഹം കൗമാരപ്രായത്തിൽ എത്തിയപ്പോഴേക്കും ഓടകുഴൽ , ഹാർമോണിയം എന്നിവ വായിക്കുന്നതിൽ പ്രാവണ്യം നേടി .
കോളേജ് വിദ്യാഭ്യാസ കാലത്താണ് അദ്ദേഹം ആദ്യമായി സംഗീതം ചിട്ടപ്പെടുത്തിയത് . സ്വാതന്ത്ര്യ സമരം നടക്കുന്ന കാലമായിരുന്നതിനാൽ ആൻഡമാനിലെ ജയിലിൽ നിന്ന് മോചിതരായവർക്ക് വേണ്ടിയാണ് അദ്ദേഹം അത് ചിട്ടപ്പെടുത്തിയത് .പിന്നീട് കർഷകർ തങ്ങളുടെ അവകാശങ്ങൾക്ക് വേണ്ടി പോരാടി തുടങ്ങിയപ്പോൾ അവർക്കു വേണ്ടി കുറെയധികം കാലം അദ്ദേഹം പാട്ടുകൾ എഴുതുകയും ചിട്ടപ്പെടുത്തുകയും ചെയ്തു .
ആദ്യമായി ഒരു ചലച്ചിത്രത്തിന് വേണ്ടി അദ്ദേഹം സംഗീതം ചിട്ടപ്പെടുത്തിയത് 1949 ൽ ഇറങ്ങിയ ബംഗാളി ചിത്രമായ പരിഭർത്തനു വേണ്ടിയായിരുന്നു . 1953 ൽ പുറത്തിറങ്ങിയ ദോ ഭീഗ സമീൻ എന്ന ഹിന്ദി ചിത്രത്തിലൂടെ ആയിരുന്നു ഹിന്ദി സിനിമ ലോകത്തേക്ക് സലിൽ ദാ രംഗപ്രവേശം ചെയ്തത് . ഏകദേശം ഇരുപത് വർഷത്തോളം ഹിന്ദിയിലും ബംഗാളിയിലും പ്രവർത്തിച്ചതിന് ശേഷമാണ് 1964 ൽ ചെമ്മീൻ എന്ന എക്കാലത്തെയും മികച്ച ചിത്രത്തിന് വേണ്ടി സംഗീതം ചിട്ടപ്പെടുത്തി കൊണ്ട് മലയാള സിനിമ ലോകത്തേക്ക് പ്രവേശിച്ചത് .
പതിമൂന്നു ഭാഷകളിൽ ഇറങ്ങിയ ചിത്രങ്ങൾക്ക് വേണ്ടി സംഗീതം ചിട്ടപ്പെടുത്തിയ അദ്ദേഹം എഴുപത്തി അഞ്ച് ഹിന്ദി ചിത്രങ്ങൾക്കും , നാല്പത്തി ഒന്ന് ബംഗാളി ചിത്രങ്ങൾക്കും , ഇരുപത്തിയേഴ് മലയാളചിത്രങ്ങൾക്കും ,കൂടാതെ ചില മറാത്തി , തമിഴ് , തെലുങ്ക് , കന്നഡ , ഗുജറാത്തി , ഒറിയ , ആസ്സാമീസ് ചിത്രങ്ങൾക്കും വേണ്ടി ഗാനം ചിട്ടപ്പെടുത്തി .മികച്ച ഗാനരചയിതാവും സംഗീതസംവിധായകനും മാത്രമല്ല, സമർത്ഥനും പ്രതിഭാധനനുമായ ഒരു സംഘാടകൻ, കവി, എഴുത്തുകാരൻ, നാടകകൃത്ത് എന്നിവ കൂടി ആയിരുന്നു അദ്ദേഹം .
വിവിധ സംഗീത ഉപകരണങ്ങളിൽ അഗാധ പാണ്ഡിത്യം ഉണ്ടായിരുന്ന അദ്ദേഹം ഓടകുഴൽ , പിയാനോ , എസ്രാജ് , വയലിൻ എന്നിവ വായിച്ചിരുന്നു . സലിൽ ദായുടെ സംഗീതത്തിന്റെ പ്രത്യേകത സംഗീത ഉപകരണങ്ങൾ വ്യത്യസ്തമായ രീതിയിൽ കോർത്തിണക്കി മനോഹരമായ സംഗീതാനുഭവം ശ്രോതാക്കൾക്ക് നൽകിയിരുന്നു എന്നതായിരുന്നു . ആ കാലത്തു ഏറ്റവും കൂടുതലായി ഉപയോഗിച്ചിരുന്ന തബലയെക്കാൾ അധികമായി അദ്ദേഹം വാദ്യോപകരണങ്ങൾ തന്റെ സംഗീതത്തിൽ ഉപയോഗിച്ചു എന്നുള്ളതാണ് അദ്ദേഹത്തിന്റെ സംഗീതത്തെ അന്നും ഇന്നും എന്നും വേറിട്ട് നിർത്തുന്നത് .
ഇന്നും ശ്രോതാക്കൾ മൂളുകയും കേൾക്കുകയും ചെയ്യുന്ന ഒരുപാട് മനോഹരമായ പാട്ടുകൾ ഇന്ത്യൻ സിനിമാലോകത്തിന് സമ്മാനിച്ച സലിൽ ദാ 1995 ൽ നിര്യാതനായി .
Comments