ഐതിഹ്യകഥകളെല്ലാം വെറും കെട്ടുകഥകൾ എന്ന് വാദിക്കുന്നവർ തീർച്ചയായും സന്ദർശിക്കണം ചില സ്ഥലങ്ങൾ. പുരാണകഥകൾ സത്യമാണെന്ന് തെളിയിക്കുന്ന ഈ സ്ഥലങ്ങൾ നിങ്ങളെ അത്ഭുതപ്പെടുത്തും, തീർച്ച.
അത്തരം സ്ഥലങ്ങളിൽ ആരും കാണാൻ കൊതിക്കുന്ന ഒരു സ്ഥലമാണ് നമ്മൾ പരിചയപ്പെടാൻ പോകുന്നത്. ദ്വാപരയുഗത്തിൽ നിലയ്ക്കാതെ പെയ്ത മഴയിൽ ശ്രീകൃഷ്ണ ഭഗവാൻ ചൂണ്ടുവിരലിൽ എടുത്തുയർത്തിയ ഗോവർധന പർവ്വതത്തെ പരിചയപ്പെടാം. വിശ്വാസികൾക്കിടയിൽ വലിയൊരു സ്ഥാനം തന്നെയാണ് ഈ പർവ്വതത്തിന് ഉള്ളത്.
പണ്ടൊരിക്കൽ വൃന്ദാവനത്തിലെ ജനങ്ങൾ ഇന്ദ്രനെയാണ് പൂജിച്ചിരുന്നത്. ഇന്ദ്രനെ തൃപ്തിപ്പെടുത്തുവാനായി അവർ എല്ലാവർഷവും പൂജകൾ തുടർന്നുപോന്നിരുന്നു. എന്നാൽ നമ്മൾ പൂജിക്കേണ്ടത് ഇന്ദ്രനെയല്ല, പകരം ഗോക്കളെയാണെന് ശ്രീകൃഷ്ണൻ പറയുകയും തുടർന്ന് ജനങ്ങൾ ഇന്ദ്രനെ പൂജിക്കുന്നതിൽ നിന്ന് പിന്മാറുകയും ചെയ്തു. ഗോക്കളെ ആരാധിക്കാൻ തുടങ്ങിയ ജനങ്ങളോട് ഇന്ദ്രന് അസംതൃപ്തി ഉണ്ടാവുകയും അവർക്കുള്ള ശിക്ഷയെന്നോണം ഭൂമിയിൽ നിർത്താതെ മഴ പെയ്യിക്കുകയും ചെയ്തു. ഈ മഴയിൽ ജനങ്ങളും മൃഗങ്ങളും വളരെയധികം ദുരിതത്തിലായി. അങ്ങനെ മഴയിൽ നിന്നുള്ള താത്കാലിക പരിഹാരമെന്ന നിലയിൽ ശ്രീകൃഷ്ണൻ ചൂണ്ടുവിരൽ ഉപയോഗിച്ച് പർവ്വതം ഉയർത്തി. പരന്ന പർവ്വതം ആയതിനാൽ എല്ലാവരെയും അതിനടിയിൽ ഉൾക്കൊള്ളിക്കാൻ സാധിച്ചു. ഏഴുദിവസത്തോളം കൃഷ്ണൻ പർവ്വതം ഉയർത്തിപ്പിടിച്ചു എന്നാണ് പറയുന്നത്. തുടർന്ന് കൃഷ്ണന്റെ ദൈവിക ശക്തിയിൽ ഇന്ദ്രന് കീഴടങ്ങേണ്ടി വന്നു.
ഈ പർവ്വതവുമായി ബന്ധപ്പെട്ട മറ്റൊരു കഥ പറയാം. ഓരോ ദിവസവും ഈ പർവ്വതം കടുകുമണിയോളം വലുപ്പം കുറയുന്നുണ്ട് എന്നാണ് പറയുന്നത്. പണ്ടൊരിക്കൽ പുലത്സ്യ മഹർഷി മഥുരയിൽ നിന്നും കാശിക്ക് പോകുന്ന വേളയിൽ പർവ്വത രാജനായ ദ്രോണകലയുടെ മകനായ ഗോവർധനനെ കൂടെ കൂട്ടാൻ ആഗ്രഹിച്ചു. പുലത്സ്യ മഹർഷിയുടെ ആവശ്യപ്രകാരം മകനെ അദ്ദേഹത്തിന്റെയൊപ്പം പറഞ്ഞയക്കാൻ ദ്രോണകല തീരുമാനിച്ചു. കൂടാതെ ഒരു നിബന്ധനയും പറഞ്ഞു. കാശിയിൽ എത്തിയാൽ മാത്രമേ ഗോവർധനനെ താഴെ വെക്കാൻ പാടുള്ളൂ എന്നും അല്ലാത്തപക്ഷം എപ്പോഴും കയ്യിൽ കരുതണം എന്നായിരുന്നു നിബന്ധന. എന്നാൽ ഒരു പ്രത്യേക സ്ഥലത്ത് എത്തിയപ്പോൾ പർവ്വതത്തിന്റെ ഭാരം വർധിക്കുവാൻ തുടങ്ങി. ഭാരം താങ്ങാനാവാതെ പുലത്സ്യ മഹർഷി പർവ്വതം താഴെ വെച്ചു. താഴെ വെക്കുവാനായി ഗോവർധനൻ ചെയ്ത കള്ളത്തരം ആണെന്ന് മനസിലാക്കിയ പുലത്സ്യ മഹർഷി ഗോവർധനനെ നോക്കി ഇങ്ങനെ ശപിച്ചു, ഓരോ ദിവസവും കടുകുമണി വലുപ്പത്തോളം ചെറുതാകട്ടെ.
പർവ്വതത്തെ വലം വെക്കുന്നത് നല്ലതാണെന്നാണ് വിശ്വാസികൾ പറയുന്നത്. ഏകദേശം 11 കിലോമീറ്ററാണ് പർവ്വതത്തിന്റെ ചുറ്റളവ്.ഉത്തർപ്രദേശിലെ മഥുരയിൽ വൃന്ദാവനത്തിനടുത്തായാണ് ഗോവർധന പർവ്വതം സ്ഥിതിചെയ്യുന്നത്.
ഈ പ്രദേശത്ത് പതിനാറാം നൂറ്റാണ്ടിലെ അവശേഷിപ്പുകളായി നിരവധി കെട്ടിടങ്ങൾ കാണാമെങ്കിലും അതുസംബന്ധിച്ച തെളിവുകളൊന്നും പുരാവസ്തു വകുപ്പിൽ ഇല്ല.നിരവധി വിശ്വാസികളും ചരിത്രകാരന്മാരും ഇവിടെ എത്താറുണ്ട്.
