പ്രകൃതി സൗന്ദര്യം തുളുമ്പി നില്ക്കുന്ന ബ്രഹ്മഗിരി മലനിരകളില് നിന്നും ഉത്ഭവിക്കുന്ന വെള്ളച്ചാട്ടമാണ് ഇരുപ്പു വെള്ളച്ചാട്ടം. കര്ണാടകയെ സമ്പുഷ്ടമാക്കുന്ന കാവേരി നദിയുടെ ഉത്ഭവസ്ഥാനം. കാപ്പി തോട്ടങ്ങളിലൂടെ നടന്നു മഞ്ഞും മഴയും താണ്ടി എത്തുന്ന ഇവിടം പ്രകൃതിയുടെ മനോഹാരിത എടുത്തു കാട്ടുന്ന സ്ഥലമാണ്. ഒരുപാട് ഐതിഹ്യങ്ങള് നിറഞ്ഞു നില്ക്കുന്ന ഇവിടെ ദിവസം തോറും ഒരുപാട് ആളുകള് എത്തിച്ചേരുന്നു. ലക്ഷ്മണ തീര്ത്ഥ എന്നും ഇവിടം അറിയപ്പെടുന്നു. രാമായണ കഥയുമായി ഏറെ ബന്ധപ്പെട്ടു കിടക്കുന്നതാണ് ഇവിടം.
വനവാസ കാലത്ത് രാവണന് സീതദേവിയെ തട്ടിക്കൊണ്ടു പോയപ്പോള് ശ്രീരാമനും ലക്ഷ്മണനും കൂടി സീതാദേവി അന്വേഷിച്ചു വന്ന വഴികളാണ് ഇവിടം എന്നും ഒരുപാട് അന്വേഷിച്ചു തളര്ന്നു ദാഹം തോന്നിയപ്പോള് ശ്രീരാമന് ലക്ഷ്മണനോട് അല്പം ദാഹജലം ആവശ്യപ്പെട്ടു എന്നും ഏറെ അന്വേഷിച്ചിട്ടും വനത്തിനുള്ളില് എവിടെയും ജലം കിട്ടിയില്ലെന്നും. തുടര്ന്ന് തന്റെ സഹോദരന്റെ ദാഹം മാറ്റാനായി അവിടെ കണ്ട ബ്രഹ്മഗിരി മലനിരകളിലേക്ക് ലക്ഷ്മണന് അമ്പെയ്തെന്നും അമ്പു ചെന്നു വീണിടത്ത് ഒരു അരുവി ഉണ്ടായി എന്നുമാണ് ഐതിഹ്യം. ഇതില് നിന്നാണ് കാവേരി നദിയുടെ ഉത്ഭവം എന്നാണ് വിശ്വാസം.
ലക്ഷ്മണ തീര്ത്ഥത്തിനടുത്താണ് രാമേശ്വര ക്ഷേത്രം സ്ഥിതി ചെയ്യുന്നത്. മഹാശിവരാത്രി നാളിലാണ് ഇവിടെ ഏറ്റവും കൂടുതല് ഭക്തജനത്തിരക്ക് അനുഭവപ്പെടുന്നത്. ശിവരാത്രി നാളില് ഇവിടെ എത്തി മുങ്ങി കുളിയ്ക്കുന്നവരുടെ എല്ലാ പാപങ്ങളും ഇല്ലാതാകുമെന്നാണ് വിശ്വാസം. കേരളത്തില് നിന്നും കര്ണാടകത്തില് നിന്നുമാണ് കൂടുതല് സഞ്ചാരികളും തീര്ത്ഥാടകരും ഇവിടെയെത്തുന്നത്. ഈ മനോഹരമായ സ്ഥലം എത്ര കണ്ടാലും മതി വരില്ല. പ്രകൃതി ഇത്രയും സുന്ദരിയായി കാണപ്പെടുന്നത് അപൂര്വ സ്ഥലങ്ങളിലൊന്നാണ് ഇരുപ്പു വെള്ളച്ചാട്ടം.
