ലണ്ടന്: വന് തട്ടിപ്പു നടത്തി ലണ്ടനിലേയ്ക്ക് രക്ഷപെട്ട നീരവ് മോഡിയുടെ കേസ്സില് വിചിത്ര വാദങ്ങളും നിഗമനങ്ങളുമായി ബ്രിട്ടീഷ് കോടതി. ഇന്ത്യയ്ക്ക് കുറ്റവാളി കൈമാറ്റ കരാര് പ്രകാരം എടുക്കേണ്ട നടപടിക്കിടെയാണ് കോടതിയില് മനശാസ്ത്രജ്ഞന്റെ റിപ്പോര്ട്ട് ചര്ച്ചയായത്. നീരവിനെ നാലു തവണ കൗണ്സിലിംഗിന് വിധേയമാക്കിയ ഡോ. ആന്ഡ്രൂ ഫോറസ്റ്ററാണ് ആത്മഹത്യാ പ്രവണതാ റിപ്പോര്ട്ട് നല്കിയത്. നീരവിനും കുടുംബത്തിനും പാരമ്പര്യമായി ആത്മഹത്യാ പ്രവണതയുണ്ടെന്നാണ് പുതിയ കണ്ടെത്തല്. വെസ്റ്റ് മിനിസ്റ്റര് മജിസ്ട്രേറ്റ് കോടതിയിലാണ് കേസ്സ്.
ജയിലില് നിലവിലെ ഏകാന്തത ആത്മഹത്യാ പ്രവണത കൂട്ടാന് സാധ്യതയുണ്ടെന്നാണ് ഡോക്ടറുടെ റിപ്പോര്ട്ട്. 49കാരനായ നീരവ് മോഡി ജ്യൂവല്ലറി തട്ടിപ്പിലും വിദേശനാണ്യ വിനിമയ തട്ടിപ്പിലും ഇന്ത്യാ ഗവണ്മെന്റ് അന്വേഷിക്കുന്ന കുറ്റവാളിയാണ്. തട്ടിപ്പ് പുറത്തുവന്നയുടനെ ബ്രിട്ടനിലേക്ക് നീരവ് രക്ഷപെടുകയായിരുന്നു. മുംബൈയിലെ ആര്തര് റോഡ് ജയിലിലാണ് നീരവിനെ എത്തിച്ചാല് പാര്പ്പിക്കേണ്ടത്. എന്നാല് അവിടത്തെ അന്തരീക്ഷം നീരവിന്റെ മാനസികാവസ്ഥ തകരാറിലാക്കുമെന്നാണ് കോടതി നിഗമനം. എന്നാല് ലണ്ടനിലേക്കാളും നല്ല അന്തരീക്ഷമാണ് മുംബൈ ജയിലേതെന്ന് ഇന്ത്യന് സര്ക്കാറിനായി ഹാജരായ ക്രൗണ് പ്രോസിക്യൂഷന് സര്വ്വീസ് അഭിഭാഷകന് വ്യക്തമാക്കി.
