മലയാളത്തിലെ പ്രിയ താരങ്ങളായ സൗബിൻ താഹീറും മഞ്ജു വാര്യരും കേന്ദ്രകഥാപാത്രങ്ങളാവുന്ന ‘വെള്ളരിക്കാ പട്ടണം’ എന്ന സിനിമയുടെ ഫസ്റ്റ് ലുക്ക് പോസ്റ്റർ പുറത്തിറങ്ങി. ആനിമേഷനിലും പരസ്യസംവിധാന രംഗത്തും വർഷങ്ങളുടെ പരിചയ സമ്പത്തുള്ള മഹേഷ് വെട്ടിയാറാണ് ചിത്രം സംവിധാനം ചെയ്യുന്നത്. കാരിക്കേച്ചർ സ്വഭാവത്തിലാണ് സിനിമയുടെ ഫസ്റ്റ് ലുക്ക് പോസ്റ്റർ അണിയിച്ചൊരുക്കിയിരിക്കുന്നത്. സിനിമയിലെ പ്രധാന കഥാപാത്രം ചെയ്യുന്ന മഞ്ജു വാര്യർ തന്നെയാണ് ‘വെള്ളരിക്കാ പട്ടണത്തി’ന്റെ പോസ്റ്റർ തന്റെ ഫേസ്ബുക്ക് പേജിലൂടെ പുറത്തുവിട്ടത്.
സൗബിനും മഞ്ജുവും തമ്മിലുള്ള കോമ്പിനേഷനാണ് ചിത്രത്തിന്റെ പുതുമയും, പ്രധാന ആകർഷണവും. കുടുംബ പശ്ചാത്തലത്തിൽ അണിയിച്ചൊരുക്കിയ സിനിമയിൽ മഞ്ജുവിനും സൗബിനും ഒപ്പം മലയാളത്തിലെ പ്രമുഖ താരങ്ങളും അണിനിരക്കുന്നു. മഞ്ജു വാര്യർ വേഷമിടുന്ന കഥാപാത്രങ്ങളെല്ലാം ഏറെ ആവേശത്തോടെ ഇരു കൈകളും നീട്ടിയാണ് പ്രേക്ഷകർ സ്വീകരിക്കാറുള്ളത്. മലയാളത്തിലെ ലേഡി സൂപ്പർ സ്റ്റാർ എന്ന പദവിയും മഞ്ജുവിന് സ്വന്തമാണ്. അതുപോലെ പുതുതലമുറയിലെ നായകന്മാരിൽ പ്രേക്ഷകരെ തന്റെ അഭിനയ മികവ് കൊണ്ട് കൈയിലെടുത്ത നടനാണ് സൗബിൻ. അതുകൊണ്ടുതന്നെ രസകരമായ കഥയും മുഹൂർത്തങ്ങളുമുള്ള ‘വെള്ളരിക്കാ പട്ടണ’ത്തിൽ സൗബിനൊപ്പം അഭിനയിക്കുന്നതിൽ വളരെ സന്തോഷമുണ്ടെന്നാണ് മഞ്ജു വാര്യർ പറയുന്നത്.
മഹേഷ് വെട്ടിയാറും ശരത് കൃഷ്ണയും രചന നിർവഹിക്കുന്ന ഈ ചിത്രം ഫുൾ ഓൺ സ്റ്റുഡിയോയാണ് നിർമ്മിക്കുന്നത്. സച്ചിൻ ശങ്കർ മന്നത്ത് ആണ് സംഗീത സംവിധായകൻ. ജയേഷ് നായർ ഛായാഗ്രഹണം നിർവഹിക്കുന്നു. സിനിമയുടെ എഡിറ്റിംഗ് ചെയ്തിരിക്കുന്നത് ഭട്ടതിരിയും, അർജുൻ ബെന്നും ചേർന്നാണ്. വസ്ത്രാലങ്കാരം ഒരുക്കുന്നത് സമീറ സനീഷും.
Comments