പാരീസ്: ഫ്രഞ്ച് ലീഗിലെ മത്സരത്തില് പി.എസ്.ജിയ്ക്ക് അപ്രതീക്ഷിത തോല്വി. നെയ്മറടക്കം അഞ്ചുപേര് ചുവപ്പുകാര്ഡു കണ്ട മത്സരത്തില് എതിരില്ലാത്ത ഒരു ഗോളിന് മാര്സെല്ലി പി.എസ്.ജിയെ തോല്പ്പിച്ചു. കളിയുടെ ആദ്യപകുതിയില് തന്നെ മാര്സെല്ലി ഒരു ഗോളിന് മുന്നിലെത്തി. തൗവിനേയാണ് മാര്സെല്ലിക്കായി ഗോള് നേടിയത്. തുടര്ന്ന് പ്രതിരോധം ശക്തമാക്കി കളിച്ച മാര്സെല്ലിക്കെതിരെ ഗോളടിക്കാനുള്ള പി.എസ്.ജിയുടെ ശ്രമങ്ങളെല്ലാം വിഫലമായി.
കളിയുടെ അവസാന നിമിഷം ഇരുഭാഗത്തും നടന്ന ഗോള് ശ്രമങ്ങളാണ് കനത്ത ഫൗളുകളില് കലാശിച്ചത്. അവസാന നിമിഷത്തെ ഇഞ്ചുറി ടൈമിലാണ് അഞ്ചു പേര്ക്ക് ഒറ്റയടിക്ക് ചുവപ്പുകാര്ഡ് കാണേണ്ടി വന്നത്. പി.എസ്.ജിയുടെ പരേഡിനാണ് ആദ്യം ചുവപ്പുകാര്ഡ് കാണേണ്ടി വന്നത്. തുടര്ന്ന് കുര്സാവയും നെയ്മറും ചുവപ്പുകാര്ഡു കണ്ടു. ഇതിനിടെ മാര്സെല്ലിയുടെ അമാവിയും ബെനഡേറ്റയും ചുവപ്പുകാര്ഡ് കണ്ട് പുറത്തായി. മാര്സെല്ലിയുടെ പ്രതിരോധ താരം ആല്വാരോ ഗോണ്സാലസിനെ നെഞ്ചില് തള്ളിവീഴ്ത്തിയതിന്റെ പേരിലാണ് റഫറി നെയ്മറെ പുറത്താക്കിയത്. വീഡിയോ റീവ്യൂവിലൂടെയാണ് ഫൗള് വിധിച്ചത്.
കളിക്കിടെ വംശീയ വിദ്വേഷം പ്രകടിപ്പിക്കുന്ന ചീത്തവിളിയും നടന്നതായി ടീമംഗങ്ങള് പരസ്പരം പഴിചാരിയിരിക്കുകയാണ്. 1984ന് ശേഷം ആദ്യമായാണ് പി.എസ്.ജി ലീഗിന്റെ ആരംഭത്തിലെ രണ്ടു മത്സരങ്ങള് തുടര്ച്ചയായി തോല്ക്കുന്നത്. ആദ്യ കളിയില് ലെനസിനെതിരേയും ഏകപക്ഷീയമായ ഒറ്റ ഗോളിന് പി.എസ്.ജി തോറ്റിരുന്നു.
