മലയാളികളുടെ ആഹാര ശീലങ്ങളില് ഒഴിച്ചു കൂടാനാവാത്ത ഒന്നാണ് അച്ചാറുകള്. മാങ്ങ, നാരങ്ങ, നെല്ലിക്ക, ഈന്തപ്പഴം, മുളക്, ചേന തുടങ്ങി വിവിധ തരത്തിലുള്ള അച്ചാറുകള് നമ്മള് കഴിച്ചിട്ടുണ്ട്. എന്നാല് നേന്ത്രപ്പഴം കൊണ്ടുള്ള അച്ചാര് കഴിച്ചവരുണ്ടോ… കുറഞ്ഞ സമയത്തിനുള്ളില് വീട്ടിലുള്ള സാധനങ്ങള് ഉപയോഗിച്ച് വളരെ പെട്ടെന്ന് ഉണ്ടാക്കാവുന്ന സ്വാദിഷ്ടമായ ഒരു അച്ചാറാണ് നേന്ത്രപ്പഴം അച്ചാര്.
എണ്ണ, നേന്ത്രപ്പഴം, കടുക്, പച്ചമുളക്, ഇഞ്ചി, കറിവേപ്പില തുടങ്ങി വളരെ കുറച്ചു സാധനങ്ങള് മാത്രം മതി നേന്ത്രപ്പഴം കൊണ്ടുള്ള അച്ചാര് തയ്യാറാക്കാന്.
ഇതിനായി പഴുത്ത നേന്ത്രപ്പഴം അധികം ചെറുതല്ലാത്ത രീതിയില് അരിഞ്ഞെടുക്കുക. ചുവടു കട്ടിയുള്ള പാത്രം അടുപ്പില് വച്ച് എണ്ണയൊഴിച്ച് ചൂടായ ശേഷം കടുകിട്ട് പൊട്ടിക്കുക. അതിലേക്ക് പച്ചമുളക് ചെറുതായി അരിഞ്ഞതും കറിവേപ്പിലയും ഇഞ്ചി ചതച്ചതും ചേര്ക്കുക. ശേഷം അരിഞ്ഞു വെച്ച നേന്ത്രപ്പഴം കൂടി ഇതിലേക്ക് ചേര്ക്കുക. ആവശ്യത്തിന് ഉപ്പും മുളകുപൊടിയും ചേര്ത്ത് നന്നായി വഴറ്റിയെടുക്കുക. ശേഷം ഇത്തിരി പഞ്ചസാരയും കൂടി ചേര്ത്ത് നന്നായി ഇളക്കുക.
അതിലേക്ക് തിളപ്പിച്ചാറിയ വെള്ളം കൂടി ചേര്ത്ത് കൊടുക്കുക. പച്ചവെള്ളം ഒരു കാരണവശാലും ഒഴിക്കരുത് പകരം തിളപ്പിച്ചാറിയ വെള്ളം തന്നെ ഉപയോഗിക്കണം. ഇത് നന്നായി തിളച്ച് എണ്ണ മുകളില് തെളിഞ്ഞ ശേഷം തീ ഓഫാക്കി ഉപയോഗിക്കാം. ചൂടോടെ ഉപയോഗിക്കാവുന്ന ഒന്നാണ് നേന്ത്രപ്പഴം അച്ചാര്. എന്നാല് ഇത് ഉണ്ടാക്കി രണ്ട് ദിവസം കഴിഞ്ഞ ശേഷമാണ് ഉപയോഗിക്കുന്നതെങ്കില് അച്ചാറിന്റെ സ്വാദ് കൂടുന്നു. ഈന്തപ്പഴം അച്ചാര് പോലെ തന്നെ മധുരമുള്ള ഒരു അച്ചാറാണ് ഇത്. അതുകൊണ്ടു തന്നെ കുട്ടികള്ക്ക് ഏറെ ഇഷ്ടപ്പെടുന്ന ഒന്നു കൂടിയാണിത്. ചപ്പാത്തി, ദോശ എന്നിവക്കൊപ്പം ചേര്ത്ത് കഴിയ്ക്കാവുന്ന ഒന്നാണ് നേന്ത്രപഴം അച്ചാര്.
