നെല്ലിക്ക ആരോഗ്യത്തിന് വളരെ നല്ലതാണ്. ദിവസവും നെല്ലിക്ക കഴിക്കുന്നത് ഒരുപാട് അസുഖങ്ങള് ഇല്ലാതാക്കാന് സഹായിക്കുന്നു. എന്നാല് നെല്ലിക്ക പച്ചയ്ക്കു കഴിക്കുമ്പോള് നല്ല പുളിപ്പ് അനുഭവപ്പെടും എന്നാല് തേനിലിട്ട നെല്ലിക്ക ആയാലോ… കേള്ക്കുമ്പോള് തന്നെ നാവില് വെള്ളമൂറും അത്രയ്ക്കു രുചികരവും അതു പോലെ തന്നെ ഔഷധ ഗുണം ഉളളതുമായ ഒന്നാണ് തേന് നെല്ലിക്ക.
തേന് കഴിക്കുന്നതും ശരീരത്തിന് ഉത്തമമാണ്. അതിനാല് ഇവ രണ്ടും കൂടിച്ചരുമ്പോള് ആരോഗ്യത്തിന് ഒരുപാട് ഗുണം ലഭിക്കുന്നു. പുറത്തു നിന്നു തേന് നെല്ലിക്ക വാങ്ങി ദിവസവും കഴിക്കാന് ബുദ്ധിമുട്ടാണ്. എന്നാല് എളുപ്പം തന്നെ വീട്ടിലുണ്ടാക്കാവുന്ന ഒന്നാണ് തേന്നെല്ലിക്ക. എങ്ങനെയാണ് വീട്ടില് എളുപ്പം ഇത് തയ്യാറാക്കിയെടുക്കുക എന്ന് നോക്കാം.
ഇതിനായി ആദ്യം ഒരേ അളവില് തേനും നെല്ലിക്കയും ശര്ക്കരയും എടുക്കണം. അരക്കിലോ നെല്ലിക്കയാണ് എടുക്കുന്നതെങ്കില് അരക്കിലോ തേനും അരക്കിലോ ശര്ക്കരയും ഉപയോഗിച്ചു വേണം തേന്നെല്ലിക്ക തയ്യാറാക്കാന്. ഇതിനായി നെല്ലിക്ക നന്നായി കഴുകി ഉണങ്ങിയ തുണി കൊണ്ട് തുടച്ചെടുക്കണം. ജലാംശം നെല്ലിക്കയില് ഉണ്ടാകാന് പാടില്ല. അതിനു ശേഷം ശര്ക്കര നന്നായി പൊടിച്ചെടുക്കുക. ഭരണിയോ കുപ്പിയോ ആണ് ഇതിനായി ഉപയോഗിക്കുന്നത്. എന്തായാലും നന്നായി കഴുകി തുടച്ച ശേഷം മാത്രമേ ഇത് തേന്നെല്ലിക്ക ഉണ്ടാക്കാനായി ഉപയോഗിക്കാന് പാടുള്ളൂ. ഒരിത്തിരി പോലും ഈര്പ്പം കുപ്പിയില് ഉണ്ടായിരിക്കാന് പാടില്ല. കുപ്പിയുടെ അടിയില് ശര്ക്കര പൊടിച്ചത് നന്നായി വിതറുക ശേഷം അതിനു മുകളിലായി നെല്ലിക്ക ഇട്ടുകൊടുക്കുക ഇതിലേക്ക് തേന് കൂടി ഒഴിച്ചു കൊടുക്കുക.
കുപ്പിയില് സമം തേനും നെല്ലിക്കയും ശര്ക്കരയും ഇട്ടശേഷം കുപ്പി നന്നായി മൂടിവയ്ക്കുക. അതിനു മുകളില് മൈദ ഉപയോഗിച്ച് നന്നായി ഒട്ടിച്ചു വയ്ക്കുക. വായു കടക്കാത്ത രീതിയില് നന്നായി മൂടി സൂക്ഷിക്കുക. അതിനു ശേഷം പതിനഞ്ച് ദിവസം കഴിഞ്ഞ് ഇത് തുറന്ന് ഈര്പ്പം ഇല്ലാത്ത സ്പൂണ് കൊണ്ട് നന്നായി ഇളക്കി യോജിപ്പിക്കുക. ശേഷം അതുപോലെ തന്നെ മൈദ ഉപയോഗിച്ച് മുപ്പത് ദിവസം വീണ്ടും ഒട്ടിച്ചു വയ്ക്കുക. മുപ്പത് ദിവസത്തിനു ശേഷം എടുത്തു ഉപയോഗിക്കാവുന്നതാണ്. മൊത്തം നാല്പത്തിയഞ്ച് ദിവസമാണ് തേന്നെല്ലിക്ക തയ്യാറാക്കാന് വേണ്ട സമയം. വളരെ സ്വാദിഷ്ടവും ഗുണപ്രദവുമായ ഇത് കുട്ടികള്ക്കും മുതിര്ന്നവര്ക്കും ഒരുപോലെ കഴിക്കാവുന്നതും ഇഷ്ടപ്പെടുന്നതുമാണ്.
