സ്മാർട്ഫോൺ യുഗമായതോടെ മിക്കവരും തങ്ങളുടെ ലോകം ഫോണുകൾക്കുള്ളിൽ തന്നെ കെട്ടിപ്പടുത്താനുള്ള ശ്രമം തുടങ്ങിയിരുന്നു. കൊറോണ വൈറസിനെത്തുടർന്നുള്ള ലോക്ക്ഡൗൺ കൂടി വന്നതോടെ ഒരു ദിവസത്തിന്റെ ഭൂരിഭാഗം സമയവും ഇവർ മൊബൈൽ ഫോണുകളിലേയ്‌ക്ക് ഒതുങ്ങി. ഇന്റര്‍നെറ്റും സോഷ്യല്‍ മീഡിയകളും ഗെയിമിംഗും ഷോപ്പിംഗും അങ്ങനെ മൊബൈല്‍ ഫോണിനെ ആശ്രയിക്കാന്‍ നമുക്ക് കാരണങ്ങള്‍ നിരവധിയാണ്.
എന്നാല്‍ ഈ സ്മാർട്ഫോണിന്റെ അമിത ഉപയോഗം നമ്മളിൽ പല തരത്തിലുള്ള ആരോഗ്യപ്രശ്‌നങ്ങൾ സൃഷ്ടിക്കുന്നുവെന്ന് നമ്മൾ മനസിലാകുന്നില്ലെന്നതാണ് യാഥാർഥ്യം. ഇത് കണ്ണിനും തലച്ചോറിനുമുണ്ടാക്കുന്ന സമ്മര്‍ദ്ദം പലപ്പോഴും നമ്മള്‍ തിരിച്ചറിയാതെ പോകുകയാണ്.
അടുത്തിടെ മെല്‍ബണില്‍ നിന്നുള്ള ഒരു കൂട്ടം ഗവേഷകര്‍ ഫോണില്‍ നിന്നും ലാപ്‌ടോപ്പില്‍ നിന്നുമെല്ലാം പ്രസരിക്കുന്ന ‘ബ്ലൂ ലൈറ്റ്’, ചര്‍മ്മത്തെ എത്തരത്തിലെല്ലാം ബാധിക്കും എന്നതിനെപ്പറ്റി ഒരു പരീക്ഷണം നടത്തി. തുടർന്ന് ഗുരുതരമായ തരത്തിലാണ് ഫോണ്‍ പോലുള്ള ഡിവൈസുകളില്‍ നിന്ന് പുറപ്പെടുന്ന നീല വെളിച്ചം ചര്‍മ്മത്തെ ബാധിക്കുന്നതെന്ന് ഗവേഷകര്‍ കണ്ടെത്തി. നീണ്ട നേരം ഫോണ്‍ പോലുള്ള ഡിവൈസുകളില്‍ നിന്നും പുറപ്പെടുന്ന നീല വെളിച്ചം ചര്‍മ്മത്തില്‍ നിറവ്യത്യാസമുണ്ടാക്കുന്നുവെന്നും പിന്നീട് പരിഹരിക്കാന്‍ കഴിയാത്ത വിധത്തില്‍ പാടുകളും മങ്ങലുകളുമേല്‍ക്കാനും ഇടയാക്കുമെന്നും പഠനം ചൂണ്ടികാട്ടുന്നു.
ശ്രദ്ധിക്കാം ഇക്കാര്യങ്ങൾ
- രാത്രിയിലെ വൈകിയുള്ള സ്‌ക്രീന്‍ സമയം പരമാവധി കുറയ്‌ക്കുക
- സ്ക്രീൻ സമയത്ത് ‘ടിന്റഡ് സണ്‍സ്‌ക്രീന്‍’, ‘അയേണ്‍ ഓക്‌സൈഡ്’ അടങ്ങിയ മേക്കപ്പ് സാധനങ്ങൾ ഉപയോഗിക്കുക
- രാത്രിയില്‍ ഫോണ്‍ ഉപയോഗിക്കുന്ന കുറഞ്ഞ സമയം പോലും സ്‌ക്രീന്‍ കളര്‍ മാറ്റിയ ശേഷമോ, ബ്രൈറ്റ്‌നെസ് കുറച്ച ശേഷമോ ഉപയോഗിക്കുക.
അതേസമയം ആറ് മണിക്കൂറോ, അതില്‍ കൂടുതലോ ദിവസത്തില്‍ ഫോണിന്റെ വെളിച്ചം കൊള്ളുന്നത് നേരിട്ട് സൂര്യപ്രകാശത്തില്‍ 25 മിനുറ്റ് നില്‍ക്കുന്നതിന് തുല്യമാണെന്നാണ് പഠനം അവകാശപ്പെടുന്നത്. ഇതില്‍ ഏഴ് മിനുറ്റ് കൊണ്ട് തന്നെ ‘ബ്ലൂ ലൈറ്റ്’ ചര്‍മ്മത്തിന് മുകളില്‍ പാട് വീഴ്‌ത്താന്‍ തുടങ്ങുമെന്നും പഠനം സൂചിപ്പിക്കുന്നു.
Comments