ഭക്ഷണ പ്രിയരാണ് നമ്മള്‍ ഓരോരുത്തരും ഒരു നേരമെങ്കിലും ഭക്ഷണം കഴിച്ചില്ലെങ്കില്‍ നമ്മുടെ ശരീരത്തെ അതു വല്ലാതെ ബാധിക്കുന്നു. തളര്‍ച്ച അനുഭവപ്പെടുകയും ചെയ്യുന്നു. എന്നാല്‍ കേരളത്തിലെ വടക്കേ അറ്റത്ത് ഒരാളുണ്ട് ഇരുപത് വര്‍ഷത്തില്‍ അധികമായി ഇളനീര്‍ മാത്രം കുടിച്ചാണ് ജീവിക്കുന്നത്. ഇദ്ദേഹത്തന് തളര്‍ച്ചയോ ക്ഷീണമോ ഇല്ലെന്നു മാത്രമല്ല പൂര്‍ണ ആരോഗ്യവാനാന്‍ കൂടിയാണ് കാസര്‍ക്കോട് ജില്ലയിലെ ചന്ദേരയിലെ ബാലകൃഷ്ണന്‍ എന്ന ബാലേട്ടന്‍. കായിക രംഗത്തെ മികവുറ്റ പ്രതിഭ കൂടിയാണ് ബാലേട്ടന്‍. ഇരുപത്തിയാറു വര്‍ഷം മുന്‍പ് അന്ന നാളത്തെ ബാധിച്ച അസുഖത്തെ തുടര്‍ന്നാണ് ഇദ്ദേഹത്തിന് ഭക്ഷണം ഒഴിവാക്കേണ്ടി വന്നത്.
എങ്കിലും ഒരു തളര്‍ച്ച പോലും ഇല്ലാതെ പരിശീലനം തുടരുകയാണ് ഈ അറുപത്തി മൂന്നുകാരന്‍. രാവിലെ നേരത്തേ തന്നെ എഴുന്നേല്‍ക്കുന്നു യോഗ ചെയ്യുന്നു. തുടര്‍ന്ന് ഗ്രൗണ്ടിലേക്ക്. ഒരു മണിക്കൂര്‍ പരിശീലനം അതിനു ശേഷം എട്ടുമണിക്ക് ഒരു ഇളനീര്‍ കുടിയ്‌ക്കും. തുടര്‍ന്ന് പതിനൊന്ന് മണി മുതല്‍ പന്ത്രണ്ട് മണി വരെ പശുവിനായുളള പുല്ലും മറ്റും ശേഖരിക്കുന്നു. അതു കഴിഞ്ഞ് കുളി. ശേഷം ഒന്നര മണിക്കൂര്‍ മാത്രമാണ് വിശ്രമം. വൈകുന്നേരമായാല്‍ ബാലേട്ടന്‍ വീണ്ടും കളത്തില്‍ ഇറങ്ങും.
2010 ലെ മലേഷ്യയില്‍ നടന്ന മാസ്റ്റേഴ്‌സ് മീറ്റില്‍ ആദ്യത്തെ 15 ഒരാളായിരുന്നു. സിവില്‍ സര്‍വീസ് ടൂര്‍ണമെന്റ് പങ്കെടുക്കാന്‍ പോയപ്പോള്‍ ആറാമതും എട്ടാമതും സ്ഥാനം വരെ എത്താന്‍ സാധിച്ചു. വെറും ഇളനീര്‍ മാത്രം കുടിച്ചാണ് ഈ മത്സരങ്ങളില്‍ പങ്കെടുക്കുന്നത്. കാലിക്കടവ് മൈതാനത്തില്‍ ബാലേട്ടന്‍ ശിഷ്യന്മാര്‍ക്ക് എന്നും പരിശീലനം നല്‍കുന്നു. സായുധ സേനയുടെ കായികക്ഷമത നേടാനായി പരിശീലനത്തിനായി ഒട്ടനവധി യുവാക്കള്‍ ബാലേട്ടനെ തേടിയെത്തുന്നു. യുവാക്കള്‍ക്ക് ഇന്നും ഊര്‍ജ്ജം പകരുന്ന ഒരു കായിക പ്രതിഭയാണ് ബാലേട്ടന്‍.
