മലയാളത്തിലെ മുതിർന്ന നടനായ മധു എൺപത്തിഏഴാം പിറന്നാളിന്റെ നിറവിലാണ് .ചലച്ചിത്രലോകത്ത് അഞ്ചു പതിറ്റാണ്ട് പിന്നിട്ട മധു ഇന്ത്യൻ സിനിമ ലോകത്തെ പ്രശസ്തരായ പലരുടെയും ഒപ്പം അഭിനയിച്ചിട്ടുണ്ട് . അതിൽ എടുത്തു പറയേണ്ട പേരാണ് അമിതാഭ് ബച്ചന്റേത് .
ഇന്നും മലയാള സിനിമയിലെ നിറസാന്നിദ്ധ്യമായ മധു മൂന്ന് ബോളിവുഡ് സിനിമകളിൽ അഭിനയിച്ചിട്ടുണ്ട് . അതിൽ ഒന്ന് അമിതാഭ് ബച്ചന്റെ കൂടെയായിരുന്നു . 1969 നവംബർ 7 ന് തീയേറ്ററുകളിൽ എത്തിയ “സാത്ത് ഹിന്ദുസ്ഥാനി ” എന്ന ബോളിവുഡ് സിനിമയിൽ ആണ് മധുവും അമിതാഭ് ബച്ചനും ഒരുമിച്ചഭിനയിച്ചത് .
അന്ന് മലയാള സിനിമയിലെ താരമായിരുന്ന മധുവിന്റെ ബോളിവുഡ് രംഗത്തേക്കുള്ള അരങ്ങേറ്റം ആയിരുന്നു “സാത്ത് ഹിന്ദുസ്ഥാനി ” എങ്കിൽ ഒരു നടൻ എന്ന നിലയിൽ അമിതാഭ് ബച്ചന്റെ ആദ്യ സിനിമയായിരുന്നു ഇത് . മധുവും അമിതാഭ് ബച്ചനും കേന്ദ്ര കഥാപാത്രങ്ങളെ അവതരിപ്പിച്ച ഈ ചലച്ചിത്രത്തിൽ മറ്റു അഞ്ചു നടൻമാർ കൂടി അഭിനയിച്ചിരുന്നു .
കെ എ അബ്ബാസ് സംവിധാനം ചെയ്ത സാത്ത് ഹിന്ദുസ്ഥാനി എന്ന ചലച്ചിത്രം, പോർച്ചുഗീസുകാരുടെ കൊളോണിയൽ ഭരണത്തിൽ നിന്ന് ഗോവയെ മോചിപ്പിക്കാൻ വേണ്ടി ശ്രമിക്കുന്ന വിവിധ മത-ഭൂമിശാസ്ത്ര പശ്ചാത്തലങ്ങളിൽ നിന്നുള്ള ഏഴ് ഇന്ത്യക്കാരുടെ കഥയാണ് പറഞ്ഞത് .ചിത്രത്തിൽ ബംഗാളി ഫുട്ബോൾ കളിക്കാരനായ ശുബോദ് സന്യാലിന്റെ വേഷത്തിലാണ് മധു എത്തിയതെങ്കിൽ അൻവർ അലി എന്ന കവിയായിട്ടായിരുന്നു അമിതാഭ് ബച്ചൻ ഈ സിനിമയിൽ എത്തിയത് .
മധു അഭിനയിച്ച മറ്റു രണ്ടു ഹിന്ദി ചലച്ചിത്രങ്ങൾ മേരേ സജ്നെ’, ‘ചകചക്’ എന്നിവയാണ് . ഏകദേശം അറുപത് വർഷത്തോളമായി ചലച്ചിത്രമേഖലയിൽ പ്രവർത്തിക്കുന്ന മധു എന്ന അതുല്യ കലാകാരന് 2004 ൽ ജെ സി ഡാനിയേൽ അവാർഡും , 2013 ൽ പദ്മശ്രീയും ലഭിച്ചിട്ടുണ്ട് .
