ഒരു കത്തെഴുതുകയാണെന്നു പറഞ്ഞാല് അതിശയത്തോടെ നോക്കും ഇന്നത്തെ തലമുറ. എന്തിനാണ് കത്തെഴുതി സമയം കളയുന്നത് അല്ലെങ്കില് ഒരു കത്തിലൂടെ പറയേണ്ട കാര്യമുണ്ടോ അതിനു പകരം ഒരു മെസ്സേജ് അയച്ചാല് പോരെ എന്നതാണ് പുതു തലമുറയുടെ ചോദ്യം. കത്തിന്റെ പ്രാധാന്യം എന്തായിരുന്നു എന്നത് പുതു തലമുറയ്ക്കു അറിയില്ല എന്നതാണ് ഇതിന് പ്രധാന കാരണം. കത്തുകളെ നാം മറന്നു തുടങ്ങി എന്നു നമ്മെ തന്നെ ഓര്മ്മിപ്പിക്കാനുളള ഒരു ദിവസമായി തപാൽ ദിനം പോലുമുണ്ട്.. സമൂഹ മാദ്ധ്യമങ്ങള് സജീവമായതോടെ കത്തിനെ മറന്നു തുടങ്ങി.
പണ്ടു കാലത്തെ ആശയ വിനിമയത്തിനുളള ഏക മാര്ഗ്ഗം കത്തായിരുന്നു. നാട്ടില് നിന്നും ദൂരെ പോയവര് അവിടെ എത്തി എന്നറിയാന് ഒരു കത്ത് ലഭിക്കണം. കൂടാതെ അവിടുത്തെ വിശേഷങ്ങള് എന്തൊക്കെ അറിയാനുളള വഴിയും കത്തു തന്നെ. എന്നാല് ഇന്ന് വിദേശത്തേക്ക് പോകുന്ന ഒരാള് അവിടെ എത്തിയ ഉടന് തന്നെ നാം വിവരം അറിയുന്നു. അത്രയ്ക്ക് സജീവമാണ് സോഷ്യല് മീഡിയ.
പിറന്നാള്, വിവാഹം തുടങ്ങിയ ദിവസങ്ങളില് ആശംസ അറിയിക്കാന് അല്ലെങ്കില് നമ്മുടെ ജീവിതത്തിലെ വിശേഷങ്ങള് അറിയിക്കാനായി എഴുതുമ്പോള് അതിലൂടെ അവര് വായിച്ചെടുക്കുന്നത് നമ്മുടെ മനസ്സാണ്. എന്നാല് ഇന്ന് ഒരു മെസേജ് മാത്രമായി അത് ഒതുങ്ങിയിരിക്കുന്നു. പഴയ തലമുറയില് ചിലരുടേയെങ്കിലും ഓര്മ്മകളില് എഴുതിയ കത്തുകളിലെ ഒരു വരിയെങ്കിലും സൂക്ഷിക്കാത്തവരായി ആരും ഉണ്ടാകില്ല. കത്തിലൂടെ വിവരങ്ങള് കൈമാറപ്പെടുമ്പോള് പരസ്പരം ഒരു ആത്മബന്ധം ഉണ്ടാകുന്നു. വര്ഷത്തില് ഒരിക്കലെങ്കിലും മനസ്സിനെ വാക്കുകളിലൂടെ പകര്ത്താന് ഒരു കത്തെഴുതാന് എല്ലാവരും ശ്രമിക്കണം.
