കണ്ണുകൾക്ക് ചുറ്റുമുള്ള ചർമ്മം കനം കുറഞ്ഞതും അത് പോലെ തന്നെ മൃദുലവുമാണ് . നേർത്ത വരകൾ പോലെ വന്ന് വാർദ്ധക്യത്തിന്റെ ആദ്യ ലക്ഷണങ്ങൾ വെളിപ്പെടുത്താൻ കഴിയുന്ന ആദ്യ ശരീര ഭാഗം കൂടിയാണ് കണ്ണുകൾക്ക് ചുറ്റുമുള്ള ചർമ്മം .അതിനാൽ തന്നെ കണ്ണുകളുടെ ചുറ്റുമുള്ള ചർമ്മത്തെ നന്നായി പരിപാലിക്കേണ്ടത് അത്യാവശ്യമാണ് .
ആളുകൾ സാധാരണയായി മറക്കുന്നതും പലപ്പോഴും ഉപയോഗിക്കാത്തതുമായ ഒന്നാണ് ഐ ക്രീമുകൾ. കണ്ണുകളുടെ ചുറ്റുമുള്ള ചർമ്മത്തിൽ ജലാംശം നിലനിർത്തുവാൻ ഒരു മോയിസ്ചറൈസർ അത്യാവശ്യമാണ് അതിനാൽ തന്നെ ഐ ക്രീമുകൾ കണ്ണുകൾക്ക് ചുറ്റും പുരട്ടുന്നത് ഗുണം ചെയ്യും .
മിക്ക ആളുകളും ശരീരത്തിൽ തേക്കാൻ ഉപയോഗിക്കുന്ന മോയിസ്ചറൈസർ തന്നെ കണ്ണുകൾക്ക് ചുറ്റും പുരട്ടാറുണ്ട് . അത് തെറ്റായ പ്രവണതയാണ് . കണ്ണുകൾക്ക് ചുറ്റും പുരട്ടാൻ ഉപയോഗിക്കേണ്ടത് , കണ്ണുകൾക്ക് വേണ്ടി പ്രത്യേകം തയ്യാറാക്കിയിട്ടുള്ള ക്രീമുകൾ ആണ് . വിറ്റാമിൻ എ അടങ്ങിയിട്ടുള്ള ഐ ക്രീം തിരഞ്ഞെടുക്കാൻ പ്രത്യേകം ശ്രദ്ധിക്കുക .
ഉറക്കം ശരിയായില്ലെങ്കിൽ കണ്ണുകൾക്ക് താഴെ കറുപ്പ് നിറം വരാൻ സാധ്യത വളരെ കൂടുതൽ ആണ് . ഇങ്ങിനെ ഉണ്ടാകുന്ന കറുപ്പ് നിറം ചിലപ്പോൾ നന്നായി ഉറങ്ങിയാലും മാറില്ല . ജനിതകമായ കാരണങ്ങൾ കൂടി ഇതിൽ ഉൾപെട്ടിരിക്കുന്നതിനാൽ കണ്ണിന് താഴെ ഉണ്ടാകുന്ന കറുപ്പ് നിറം മാറാൻ ബുദ്ധിമുട്ടാണ് . എന്നിരുന്നാലും കറുപ്പിന്റെ കാഠിന്യം കുറയ്ക്കാനായി വിറ്റാമിൻ കെ അടങ്ങിയ ഐ ക്രീമുകൾ ഉപയോഗിക്കുന്നത് നന്നായിരിക്കും . കൂടാതെ കാപ്പിപ്പൊടി കുഴച്ചു കണ്ണിനടിയിൽ തേക്കുന്നതും ഗുണം ചെയ്യും .
കുറഞ്ഞത് എട്ട് മണിക്കൂർ എങ്കിലും ഉറങ്ങാൻ ശ്രദ്ധിക്കുക . ദിനവും ആവശ്യത്തിന് വെള്ളം കുടിക്കുക . ഭക്ഷണത്തിൽ ഉപ്പിന്റെ അളവ് കുറക്കാൻ ശ്രദ്ധിക്കുക . പുകവലി തുടങ്ങിയ ദുശീലം കണ്ണിന് താഴെ കറുപ്പ് നിറം ഉണ്ടാകാൻ കാരണമാകും . അതിനാൽ അത്തരത്തിൽ ഉള്ള ദുശീലങ്ങൾ ഇല്ലാതാക്കാൻ ശ്രമിക്കുക . ഇത്രയും കാര്യങ്ങൾ പിന്തുടർന്നാൽ കണ്ണിന് ചുറ്റും ഉണ്ടാകുന്ന കറുപ്പ് നിറം ഒരുപരിധി വരെ തടയാൻ സാധിക്കും .
കണ്ണിൽ തണുത്ത ടീ ബാഗുകൾ വെക്കുന്നത് കറുപ്പ് നിറം കുറക്കാൻ സഹായിക്കും . ദിനവും വെളിച്ചെണ്ണയും ബദാം എണ്ണയും കൂട്ടി ചേർത്ത് കണ്ണുകളിൽ മസ്സാജ് ചെയ്യുന്നത് കണ്ണിന് ചുറ്റും ഉണ്ടാകുന്ന കറുപ്പ് നിറത്തിന്റെ കാഠിന്യം കുറക്കാൻ സഹായിക്കും .
നാരങ്ങാ നീരും തക്കാളി നീരും സമം ചേർത്ത് കണ്ണിന് ചുറ്റും പുരട്ടി മസ്സാജ് ചെയ്തതിന് ശേഷം അല്പ സമയം കഴിഞ്ഞു കഴുകി കളയുക . ദിനവും ഈ പ്രക്രിയ ചെയ്യുന്നത് കണ്ണിന് ചുറ്റുമുള്ള കറുപ്പ് നിറം കുറക്കാൻ സഹായിക്കും .
