കാഴ്ചശക്തിയും രോഗപ്രതിരോധ ശേഷിയും വർദ്ധിപ്പിക്കുന്നതിനായി കാരറ്റ് -പാൽ പാനീയം

ആരോഗ്യകരമായ ഭക്ഷണത്തിൽ പഴങ്ങളും പച്ചക്കറികളും അടങ്ങിയിരിക്കണം, എന്നത് കുട്ടിക്കാലം മുതൽ തന്നെ നാം കേട്ടിട്ടുള്ളതാണ് . കുട്ടികാലത്ത് ഗുണകരമെങ്കിലും നാം കഴിക്കാൻ മടി കാണിച്ചിരുന്ന പല ഭക്ഷ്യവസ്തുക്കളും ഇന്ന് നമ്മൾ കുട്ടികളോട് കഴിക്കാൻ ആവശ്യപെടുന്നു . എന്തൊരു വൈരുധ്യം അല്ലെ. അന്ന് പച്ചക്കറികളുടെയും പഴവർഗ്ഗങ്ങളുടെയും ഗുണങ്ങൾ നമ്മുക്ക് പ്രശ്നമല്ലായിരുന്നു എങ്കിലും നമ്മുടെ രക്ഷകർത്താക്കൾക്കു അവയുടെ ഗുണം എത്രത്തോളം ഉണ്ടെന്ന് അറിയാമായിരുന്നു . അതെ അവസ്ഥ തന്നെയാണ് ഇന്ന് നമ്മളും അഭിമുഖീകരിക്കുന്നത് .

ഇന്ന് ഏത് സമയത്തും സുലഭമായി ലഭിക്കുന്ന കാരറ്റ് സാലഡുകളിലും , കറികളിലും മറ്റും സ്ഥിരമായി ഉപയോഗിച്ചു പോരുന്നു . ചെറിയ മധുരത്തോടെ ഉള്ള കാരറ്റ് പോഷകങ്ങൾ ഏറെ അടങ്ങിയിട്ടുള്ള ഒന്നാണ് എന്നുള്ളത് ഏവർക്കും അറിയാവുന്ന വസ്തുത തന്നെയാണ് .

വിറ്റാമിൻ എ ധാരാളമായി അടങ്ങിയിട്ടുള്ള കാരറ്റ് , കണ്ണുകളുടെ ആരോഗ്യത്തിനും കാഴ്ചശക്തിക്കും വളരെ ഉത്തമമായ ഒന്നാണ് . നാരുകളും കാർബോഹൈഡ്രേറ്റ്സും  അടങ്ങിയിരിക്കുന്ന കാരറ്റ് നമ്മുടെ ആഹാരക്രമത്തിന്റെ ഭാഗമാക്കുകയാണെങ്കിൽ ശരീര ഭാരം കുറക്കാനും സഹായകമാകും .

കാരറ്റ് ഉപയോഗിച്ച് ധാരാളം വിഭവങ്ങൾ ഉണ്ടാക്കാം . അതിൽ ഒരു വിഭവമാണ് പോഷകങ്ങൾ ധാരാളമായി അടങ്ങിയിട്ടുള്ള കാരറ്റും പാലും ചേർത്ത് ഉണ്ടാക്കാവുന്ന പാനീയം .രോഗപ്രതിരോധ ശേഷി വർദ്ധിപ്പിക്കാനും കണ്ണുകളുടെ ആരോഗ്യത്തിനും ഇവ രണ്ടും ചേർത്തുണ്ടാക്കുന്ന പാനീയം പണ്ട് മുതൽക്കേ കുട്ടികൾക്ക് കൊടുക്കുന്ന ഒന്നാണ് .

കാരറ്റ് – പാൽ പാനീയം തയ്യാറാക്കാൻ വേണ്ടുന്ന ചേരുവകൾ

1 . തൊലി കളഞ്ഞ കാരറ്റ് – രണ്ടെണ്ണം

2 . പാൽ – രണ്ട് കപ്പ്

3 . കറുവപ്പട്ട – ഒരു കഷ്ണം

4 . ഗ്രാമ്പൂ – ഒന്ന്

5 . തേൻ : രണ്ട് ടീസ്പൂൺ

6 . ബദാം ചെറുതായി നുറുക്കിയത് അഞ്ചാറെണ്ണം

7 . കുങ്കുമപ്പൂവ് – വേണമെങ്കിൽ മാത്രം ആവശ്യത്തിന്

കാരറ്റ് – പാൽ പാനീയം തയ്യാറാക്കേണ്ടുന്ന വിധം

1 . കാരറ്റ് നന്നായി അരിഞ്ഞതിന് ശേഷം പ്രഷർ കുക്കറിൽ വേവിക്കുക .

2 . വേവിച്ച കാരറ്റും നുറുക്കി വെച്ചിരിക്കുന്ന ബദാമും കൂടി ചേർത്ത് അല്പം വെള്ളം കൂട്ടി നന്നായിട്ടരച്ചെടുക്കുക .

3 . പാൽ ഒരു പാത്രത്തിലേക്കൊഴിച്ച് കറുവപ്പട്ടയും ഗ്രാമ്പുവും കൂടി ചേർത്ത് തിളപ്പിക്കുക .

4 . ചെറുതീയിൽ തിളയ്‌ക്കുന്ന പാലിലേക്ക് അരച്ച് വെച്ചിരിക്കുന്ന കാരറ്റ് ബദാം മിശ്രിതം ചേർത്ത് നാല് മിനിറ്റ് ഇളക്കുക .

5 . തണുത്തതിന് ശേഷം ഇതിലേക്ക് തേൻ ചേർത്ത് വീണ്ടും മിക്സിയിൽ ഇട്ട് അടിച്ചെടുക്കുക .

പോഷക സമൃദ്ധമായ കാരറ്റ് – പാൽ പാനീയം തയ്യാർ .