അബുദാബി: അവസാന പന്തുവരെ ആവേശം നിറഞ്ഞുനിന്ന മത്സരത്തിനൊടുവില് സണ് റൈസേഴ്സ് ഹൈദരാബാദിനെതിരെ കൊല്ക്കത്ത നൈറ്റ് റൈഡേഴ്സിന് വിജയം. സൂപ്പര് ഓവറിലേയ്ക്ക് നീണ്ട മത്സരത്തില് പേസര് ലോക്കി ഫെര്ഗൂസന്റെ തീപ്പൊരി പ്രകടനമാണ് കൊല്ക്കത്തയ്ക്ക് തുണയായത്.
സൂപ്പര് ഓവറില് ആദ്യം ബാറ്റ് ചെയ്ത ഹൈദരാബാദിനെ ഫെര്ഗൂസണ് പിടിച്ചുകെട്ടി. നായകന് ഡേവിഡ് വാര്ണറെ ആദ്യ പന്തില് തന്നെ ഫെര്ഗൂസണ് ക്ലീന് ബൗള്ഡ് ചെയ്തു. അബ്ദുള് സമദ് 2 റണ്സെടുത്തു. സമദിന്റെയും കുറ്റിതെറുപ്പിച്ച് ഫെര്ഗൂസണ് കൊല്ക്കത്തയുടെ വിജയലക്ഷ്യം ഒരു ഓവറില് 3 റണ്സാക്കി മാറ്റി. നേരത്തെ 4 ഓവറില് 15 റണ്സ് മാത്രം വഴങ്ങി ഫെര്ഗൂസണ് 3 വിക്കറ്റ് വീഴ്ത്തിയിരുന്നു. മറുപടി ബാറ്റിംഗില് 2 പന്തുകള് ബാക്കി നിര്ത്തി കൊല്ക്കത്ത വിജയലക്ഷ്യം മറികടന്നു.
നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ കൊല്ത്തയ്ക്ക് വേണ്ടി ഓപ്പണര്മാരായ ശുഭ്മാന് ഗില്ലും(36) രാഹുല് ത്രിപാഠിയും(23) മികച്ച തുടക്കമാണ് നല്കിയത്. നിതീഷ് റാണ 29 റണ്സെടുത്തു. വെടിക്കെട്ട് ബാറ്റ്സ്മാനായ ആന്ദ്രെ റസല്(9) വീണ്ടും നിരാശപ്പെടുത്തി. 23 പന്തില് 34 റണ്സോടെ പുറത്താകാതെ നിന്ന നായകന് ഇയന് മോര്ഗന്റെയും 14 പന്തില് 29 റണ്സ് നേടി മോര്ഗന് പിന്തുണ നല്കിയ ദിനേശ് കാര്ത്തിക്കിന്റെയും പ്രകടനമാണ് കൊല്ക്കത്തയ്ക്ക് പൊരുതാനുള്ള സ്കോര് സമ്മാനിച്ചത്.
ഹൈദരാബാദിന് വേണ്ടി തംഗരശു നടരാജന് 4 ഓവറില് 40 റണ്സ് വഴങ്ങി 2 വിക്കറ്റ് വീഴ്ത്തി. ബേസില് തമ്പി, വിജയ് ശങ്കര്, റാഷിദ് ഖാന് എന്നിവര് ഓരോ വിക്കറ്റ് വീതം സ്വന്തമാക്കി.
163 റണ്സ് വിജയലക്ഷ്യവുമായി ബാറ്റിംഗ് ആരംഭിച്ച ഹൈദരാബാദിന് വേണ്ടി ജോണി ബെയര്സ്റ്റോയും(36) കെയ്ന് വില്യംസണും(29) മികച്ച തുടക്കം നല്കി. ഒന്നാം വിക്കറ്റില് ഇരുവരും ചേര്ന്ന് 58 റണ്സ് കുറിച്ചു. പ്രിയം ഗര്ഗ് 4 റണ്സെടുത്ത് പുറത്തായി. ഇതിന് പിന്നാലെ ക്രീസിലെത്തിയ ഡേവിഡ് വാര്ണര് ഒരറ്റത്ത് ഉറച്ചുനിന്നു. 33 പന്തില് 47 റണ്സെടുത്ത വാര്ണറിന്റെ പ്രകടനമാണ് ഹൈദരാബാദിനെ കൊല്ക്കത്തയ്ക്ക് ഒപ്പമെത്തിച്ചത്.
Comments