അബുദാബി: കൊല്ക്കത്ത നൈറ്റ് റൈഡേഴ്സ് ബാറ്റിംഗ് നിരയെ പിടിച്ചുകെട്ടി ബാംഗ്ലൂര് ബൗളര്മാര്. ടോസ് നേടി ആദ്യം ബാറ്റ് ചെയ്ത കൊല്ക്കത്തയ്ക്ക് നിശ്ചിത 20 ഓവറില് 8 വിക്കറ്റ് നഷ്ടത്തില് 84 റണ്സ് നേടാനെ സാധിച്ചുള്ളൂ. കൊല്ക്കത്തയുടെ ബാറ്റിംഗ് നിരയില് നാല് പേര്ക്ക് മാത്രമാണ് രണ്ടക്കം കടക്കാനായത്.
ഓപ്പണര്മാരായ ശുഭ്മാന് ഗില്ലും(1) രാഹുല് ത്രിപാഠിയും(1) മൂന്നാമനായെത്തിയ നിതീഷ് റാണയും(0) ഒന്നും ചെയ്യാനാകാതെയാണ് മടങ്ങിയത്. ടീം സ്കോര് 3 റണ്സില് എത്തിയപ്പോള് തന്നെ മൂന്ന് മുന്നിര വിക്കറ്റുകള് കൊല്ക്കത്തയ്ക്ക് നഷ്ടമായിരുന്നു. രണ്ടാം ഓവറില് തുടര്ച്ചയായ രണ്ട് പന്തുകളില് രാഹുല് ത്രിപാഠിയെയും നിതീഷ് റാണയെയും മടക്കി മൊഹമ്മദ് സിറാജാണ് ബാംഗ്ലൂരിന് മേല്ക്കൈ നേടിക്കൊടുത്തത്. സിറാജിന്റെ ആദ്യ രണ്ട് ഓവറുകളും മെയ്ഡനായിരുന്നു എന്നതാണ് മറ്റൊരു സവിശേഷത. 16 ഡോട്ട് ബോളുകളും സിറാജിന്റെ സ്പെല്ലില് ഉണ്ടായിരുന്നു.
ടോം ബാന്റണ് 10 റണ്സും കുല്ദീപ് യാദവ് 12 റണ്സുമെടുത്തു. 30 റണ്സെടുത്ത നായകന് ഇയന് മോര്ഗന് മാത്രമാണ് പിടിച്ചുനിന്നത്. ലോക്കി ഫെര്ഗൂസന് 19 റണ്സുമായി പുറത്താകാതെ നിന്നു. ബാംഗ്ലൂരിന് വേണ്ടി മൊഹമ്മദ് സിറാജ് 4 ഓവറില് 8 റണ്സ് മാത്രം വഴങ്ങി 3 വിക്കറ്റ് വീഴ്ത്തി. ചഹല് 2 വിക്കറ്റും നവ്ദീപ് സൈനി, വാഷിംഗ്ടണ് സുന്ദര് എന്നിവര് ഓരോ വിക്കറ്റും സ്വന്തമാക്കി.
