അബുദാബി: കൊല്ക്കത്ത നൈറ്റ് റൈഡേഴ്സിനെതിരെ റോയല് ചലഞ്ചേഴ്സ് ബാംഗ്ലൂരിന് അനായാസ ജയം. 85 റണ്സ് വിജയലക്ഷ്യം പിന്തുടര്ന്ന ബാംഗ്ലൂര് 13.3 ഓവറില് 2 വിക്കറ്റ് നഷ്ടത്തില് ലക്ഷ്യം മറികടന്നു.
ചെറിയ ലക്ഷ്യത്തിലേയ്ക്ക് ബാംഗ്ലൂരിന്റെ ഓപ്പണര്മാര് കരുതലോടെയാണ് ബാറ്റ് വീശിയത്. മലയാളി താരം ദേവ്ദത്ത് പടിക്കല് 17 പന്തില് 25 റണ്സും ആരോണ് ഫിഞ്ച് 21 പന്തില് 16 റണ്സും നേടി. മൂന്നാമനായെത്തിയ ഗുര്ക്രീത് 21 റണ്സുമായും നായകന് വിരാട് കോഹ്ലി 18 റണ്സുമായും പുറത്താകാതെ നിന്നു. കൊല്ക്കത്തയ്ക്ക് വേണ്ടി ഫെര്ഗൂസണ് ഒരു വിക്കറ്റ് വീഴ്ത്തി.
നേരത്തെ, ടോസ് നേടി ആദ്യം ബാറ്റ് ചെയ്ത കൊല്ക്കത്തയ്ക്ക് നിശ്ചിത 20 ഓവറില് 8 വിക്കറ്റ് നഷ്ടത്തില് 84 റണ്സ് നേടാനെ സാധിച്ചുള്ളൂ. കൊല്ക്കത്തയുടെ ബാറ്റിംഗ് നിരയില് നാല് പേര്ക്ക് മാത്രമാണ് രണ്ടക്കം കടക്കാനായത്. രണ്ടാം ഓവറില് തുടര്ച്ചയായ രണ്ട് പന്തുകളില് രാഹുല് ത്രിപാഠിയെയും നിതീഷ് റാണയെയും മടക്കി മൊഹമ്മദ് സിറാജാണ് ബാംഗ്ലൂരിന് മേല്ക്കൈ നേടിക്കൊടുത്തത്. സിറാജിന്റെ ആദ്യ രണ്ട് ഓവറുകളും മെയ്ഡനായിരുന്നു എന്നതാണ് മറ്റൊരു സവിശേഷത. 16 ഡോട്ട് ബോളുകളും സിറാജിന്റെ സ്പെല്ലില് ഉണ്ടായിരുന്നു.
ജയത്തോടെ റോയല് ചലഞ്ചേഴ്സ് ബാംഗ്ലൂര് മുംബൈ ഇന്ത്യന്സിനെ മറികടന്ന് പോയിന്റ് പട്ടികയില് രണ്ടാം സ്ഥാനത്തെത്തി. കൊല്ക്കത്ത നാലാം സ്ഥാനത്ത് തുടരുകയാണ്. ഡല്ഹി ക്യാപിറ്റല്സാണ് ഒന്നാം സ്ഥാനത്ത്.
Comments