പാരീസ് : ഫ്രാൻസ് തുർക്കി ബന്ധം ഉലയുന്നതിനിടെ തയ്യിപ് എർദോഗാനെ കണക്കിന് പരിഹസിച്ച് ഷാർലി ഹെബ്ദോ മാഗസിൻ. ഇൻ പ്രൈവറ്റ് ഹീ ഈസ് ഫണ്ണി എന്ന തലക്കെട്ടോടെയാണ് ഷാർലി ഹെബ്ദോ മുഖചിത്രമായി എർദോഗാന്റെ കാർട്ടൂൺ കൊടുത്തിരിക്കുന്നത്.
ഓൺലൈനായി ചൊവ്വാഴ്ച്ച റിലീസ് ചെയ്ത മാഗസിനിലാണ് എർദോഗാനെ കളിയാക്കിയിരിക്കുന്നത്. ബിയർ ബോട്ടിലുമായി സോഫയിൽ ഇരിക്കുന്ന എർദോഗാൻ ഗ്ലാസുമായി വന്ന പർദ്ദ ധരിച്ച സ്ത്രീയുടെ വസ്ത്രം ഉയർത്തുന്ന രീതിയിലാണ് കാരിക്കേച്ചർ വരച്ചിരിക്കുന്നത്.
ഫ്രാൻസിൽ മുഹമ്മദ് നബിയുടെ കാർട്ടൂൺ വിദ്യാർത്ഥികളെ കാണിച്ചു എന്നാരോപിച്ച് സ്കൂൾ ടീച്ചറുടെ കഴുത്തറുത്തു കൊന്ന സംഭവത്തോടെയാണ് ഫ്രാൻസ് – തുർക്കി ബന്ധം ഉലഞ്ഞത്. സംഭവത്തിനു ശേഷം ഇസ്ലാമിക മതതീവ്രവാദികൾക്കെതിരെ ശക്തമായ നടപടികളാണ് ഫ്രാൻസ് എടുത്തത്. ഇതേതുടർന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോണിന് മാനസിക നില തെറ്റിയെന്ന ആരോപണവുമായി തുർക്കി പ്രസിഡന്റ് രംഗത്തെത്തിയിരുന്നു.
ഫ്രാൻസിന്റെ ഉത്പന്നങ്ങൾ ബഹിഷ്കരിക്കാൻ ചില ഇസ്ലാമിക രാജ്യങ്ങൾ ആഹ്വാനം ചെയ്തതും വലിയ വിവാദങ്ങൾക്ക് വഴി തെളിച്ചിരുന്നു. ഇതിനു പിന്നാലെ ഫ്രാൻസിന് പിന്തുണയുമായി നിരവധി രാജ്യങ്ങൾ രംഗത്തെത്തി. ഈ സാഹചര്യത്തിലാണ് എർദോഗാനെ കണക്കിന് പരിഹസിച്ച് ഷാർലി ഹെബ്ദോ കാർട്ടൂൺ വരച്ചത്.
നേരത്തെ മുഹമ്മദ് നബിയുടെ കാർട്ടൂൺ വരച്ചെന്നാരോപിച്ച് ഇസ്ലാമിക ഭീകരർ ഷാർലി ഹെബ്ദോയുടെ ഓഫീസ് ആക്രമിച്ച് നിരവധി പേരെ വധിച്ചിരുന്നു.
